Uyghurlarning "Androyid" yanfonlirimu "Alma" yanfonliridek hujumgha uchrighan

Muxbirimiz irade
2019-09-03
Élxet
Pikir
Share
Print

Forbés zhurnili chet'ellerdiki Uyghurlar qolliniwatqan androyid yanfonliriningmu xuddi "Alma" shirkitining yanfonlirigha oxshashla hujumgha uchrighanliqini xewer qildi.

Téxi bir kün awwal, forbés zhurnili xewer tarqitip, gogul we mikrosoft sistémilirining mexsus Uyghurlarning "Alma" téléfonlirigha suqunup kirip uchur oghrilaydighan bir tor jasusluq hujumigha uchrighanliqini xewer qilghan.

3-Séntebir küni forbés zhurnilining xewer qilishiche, "Alma" shirkitining ayfonlirigha qilin'ghan yuqiriqidek hujumgha "Androyid" yanfonlirimu oxshash uchrighan.

Xewerde éytilishiche, mexsus chet'ellerdiki Uyghurlarning téléfonliridiki uchurlarni oghrilashni meqset qilghan bu xakkirlar aldi bilen Uyghurlar köp ziyaret qilidighan Uyghur akadémiyesi, türkistan xewerliri, türkistan téléwiziyesi we istiqlal xewer tor betliri qatarliq 11 tor betke hujum qilish arqiliq, bu tor betlerni uni ziyaret qilghan ayfon yaki androyd téléfonlirini yuqumlanduridighan qilip özgertken. Netijide, bu tor betlerge kirgen yanfonlar jasusluq wirusi bilen yuqumlan'ghan.

Xewerde qeyt qilinishiche, bu jasusluq wirusi ayfon ishletküchilerning ayfonidiki mewjut bixeterlik boshluqidin paydilinip, yanfondiki süret, qisqa uchur we shundaqla yene wats'ap, télégramma qatarliq alaqe yumtalliridiki uchurlirini shundaqla yanfon igisining jughrapiyelik orni qatarliq uchurlarni oghrilighan bolushi mumkin iken.

Melum bolushiche, gogul shirkitidiki mutexessisler bu wirusni bayqap, ehwalni "Alma" shirkitige melum qilghandin kéyin, ular bu yil 2‏-ayda ayfondiki bu boshluqni étiwetken bolsimu, u ariliqta zadi qanchilik Uyghurning yanfonidiki uchurning oghrilan'ghanliqi éniq emes.

Toluq bet