Ақсу вилайитигә қобул қилинған 134 алаһидә штатлиқ оқутқучидин аран 5 нәпириниң уйғур болуши диққәт қозғиди

Мухбиримиз ирадә
2019-08-29
Елхәт
Пикир
Share
Принт

Йеқинда ақсу вилайәтлик маарип идариси бу йил вилайәт тәвәсидики һәрқайси башланғуч-оттура мәктәпләргә бир туташ қобул қилинған 134 нәпәр алаһидә штатлиқ оқутқучиларниң тизимликини елан қилди.

Ават наһийәлик һөкүмәт торида елан қилинған мәзкур тизимликтин ашкарилинишичә, қобул қилинған 134 нәпәр алаһидә штатлиқ оқутқучиниң аран 5 нәпири уйғур миллитидин болуп, қалғанларниң һәммиси хитай икән.

Уйғурлар нопуси зич җайлашқан ақсу вилайитидики оқутқучиларниң милләт тәркибидики бу еғир тәңпуңсизлиқ диққәт қозғиди.

Дуня уйғур қурултийиниң баянатчиси дилшат ришит бу һәқтә тохтилип, юқириқи бу вәқәниң һазир уйғур елиниң башқа районлиридиму бирдәк мәвҗутлуқини, уйғур елидики иш пурсәтлиридин хитайларниң пайдилиниватқанлиқини билдүрди.

Дәрвәқә, йеқиндин буян уйғур елидики тор бәтләрдә хитай миқяси бойичә оқутқучи вә сақчи хадими қобул қилиш һәққидә елан қилиниватқан уқтурушларниң алаһидә көплүки диққәт қозғиған.

Дилшат ришит хитай һөкүмити уйғур елидә лагер түзүмини йолға қоюп, аз дегәндә 2 милйон уйғур, қазақ қатарлиқ йәрлик хәлқләрни лагерларға қамиғандин кейин районни хитай көчмәнләр билән толдуруш арқилиқ мутләқ контроллуқни ишқа ашурушни көзләватқанлиқини билдүрди.

Пикирләр (0)
Share
Толуқ бәт