Хитай һөкүмити «хитайлаштуруш» ни ашкара тәрғиб қилмақта

Мухбиримиз әзиз
2020-05-20
Елхәт
Пикир
Share
Принт

Уйғурлар диярида йиллардин буян мәҗбурий давам қилип келиватқан «милләтләр иттипақлиқи тәрбийәси ейи» паалийити бу йилдин башлап йеңидин ишләп чиқилған лайиһә бойичә өткүзүлмәкчикән. «Ақсу ахбарат тори» ниң 14-майдики хәвиридә ейтилишичә, бу паалийәт ақсу районида  «җуңхуа миллити бир аилә кишилиридәк болуп, бир нийәттә җуңго арзусини рояпқа чиқириш» дегән шоар астида мәхсус хизмәт лайиһиси билән башланған.

Хәвәрдә ейтилишичә, бу қетимқи хизмәт лайиһәсидә йиллардин буян давам қилип келиватқан «үч айрилалмаслиқ» тин башқа  «әсәбийликни түгитиш», хитай дөлитини, хитай миллитини, хитай мәдәнийитини, хитай компартийәсини вә хитай сотсиялизмини қәлбтин етирап қилиштәк «бәш қараш» ни тикләшниң бу паалийәттики муһим хизмәт икәнлики тәкитләнгән. Шуниңдәк «һәммә милләт бир аилә кишилиридәк болуш» лазимлиқи әскәртилгән.

Бәзи анализчилар хитай һөкүмити чиқарған бу уқтуруштики мәзмунларға асасән «буниңда һечқандақ иттипақлиқ мәзмуни йоқ. Бу уйғурларни очуқ-ашкарила хитайлишишқа мәҗбурлаштин башқа нәрсә әмәс» дейишти.

Түрлүк хәвәр вә учурлар нөвәттә уйғурлар диярида мәҗбурий чошқа гөши йегүзүш, хитайчә кийиниш, хитайчә өй җабдуқлирини омумлаштуруш һәрикитиниң давам қиливатқанлиқини көрситидиған болуп, америкадики мустәқил көзәткүчи илшат һәсән «бу хитай һөкүмитиниң ‹қуйруқ көрситип өпкә сетиш' тәк кона нәйриңи. Уларниң бу хил иттипақлиқ тәшвиқати һәрқачан уйғурларға қаритилған» деди.

Пикирләр (0)
Share
Толуқ бәт