Xitayning "Shangtang téxnologiye" shirkiti Uyghur rayonidiki pay chékini sétiwetken

Muxbirimiz erkin
2019-04-15
Élxet
Pikir
Share
Print

Xitayning xelq'arada "Sens tayim" dégen nam bilen tonulghan "Shangtang téxnologiye" shirkiti Uyghur rayonidiki yene bir téxnika shirkiti bilen ortaqliship qurghan shirkitining péyini sétiwetken.

"Shangtang téxnologiye shirkiti xitay saqchi organlirini yüz tonush téxnikasi bilen teminleydighan yumshaq détal shirkiti bolup, mezkur shirket 2017‏-yili 11‏-ayda Uyghur aptonom rayonidiki "Lé'on" namliq sandan analizi we nazaret téxnologiye shirkiti bilen birliship, "Tangli téxnilogiyesi" namliq shirket qurghan. Shangta téxnologiye guruhi tangli shirkitining 51 % péyini kontrol qilghan idi.

Lékin en'gliye "Maliye waqti géziti" ning 15‏-aprél ashkarilishiche, "Shangtang téxnologiye shirkiti" yéqinda "Tangli téxnologiye" shirkitining 51 % pay chékini "Lé'on" shirkitige sétip bergen. Xewerde, "Shangtang shirkiti" ning ötken ayning axirlirida élan qilghan bayanati neqil keltürülgen bolup, bayanatta "Shangtangning öz tereqqiyati" ni közde tutup, shirketning 51% pay chékini satqanliqi tekitlen'genliki bildürülgen. Lékin "Maliye waqti géziti" ning ilgiri sürüshiche, "Shangtang téxnologiye shirkiti" ning péyini sétishidiki seweb xitay da'irilirining Uyghurlarni keng kölemlik teqib qilishi we yighiwélish lagérlirigha qamishi xelq'arada qattiq naraziliqqa uchrighanliqi bilen munasiwetlik iken.

Xewerde, "Shangtang téxnologiye shirkiti" ning "Lé'on" bilen birliship Uyghur rayonida shirket qurushi uninggha meblegh séliwatqan xelq'ara shirketlerning endishisini qozghighan bolushi mumkinliki ilgiri sürülgen.

Xitayning Uyghurlar, qazaq we bashqa yerlik musulman xelqlerge qarita keng kölemlik teqiblesh élip bérip, 2 milyondek kishini yighiwélish lagérlirigha qamishi gherb döletlirining qattiq tenqidige uchrap kéliwatqan idi. Nöwette amérika dölet mejliside Uyghur rayonida kishilik hoquqni depsende qilishqa qatnishiwatqan xitay shirketlirini jazalash, amérika karxanilirining bu shirketler bilen soda qilishi, ulargha meblegh sélishini cheklesh heqqide bir qanun teklip layihisi sunulghan idi.

"Maliye waqti géziti" ning xewiride qeyt qilinishiche, "Shangtang téxnologiye shirkiti" Uyghur rayonigha meblegh sélishtin chékinip chiqqan tunji xitay karxanisi iken. Mezkur shirketning bayanatchisi "Shirketning lé'on bilen héchqandaq alaqisi qalmidi. Shuningdek shinjangda héchqandaq tijaritimiz qalmidi" dégen.

Toluq bet