Хитай шимали корейәгә нефит мәһсулати тәминләшни қисқартидикән

Мухбиримиз үмидвар
2017-09-24
Елхәт
Пикир
Share
Принт

Шимали корейә рәһбири ким җунюн америка президенти трамп вә б д т ниң шимали корейәгә қаратқан ембарголирини әйибләп сөз қилип, өзиниң йәнә тинч окянда водород бомбиси синиқи елип баридиғанлиқ тәһдитини җакарлиши нәтиҗисидә шимали корейә кризиси техиму җиддийлишиватқан бир пәйттә, хитай һөкүмити шимали корейәгә нефит мәһсулатлирини експорт қилишқа чәк қойғанлиқини елан қилған.

Америкиниң «а б с хәвәрлири» тор сәһиписидики бу һәқтики хәвәрдин мәлум болушичә, хитай 1-өктәбирдин етибарән шимали корейәгә експорт қилидиған пишшиқлап ишләнгән нефит миқдарини кемәйтип, һәр йили икки милйон тонниға қисқартидиғанлиқи, әмма, шимали корейәгә суюқлитилған тәбиий газ қатарлиқларни експорт қилишни дәрһал тохтитидиғанлиқини җакарлиған. Униң алдида бирләшкән дөләтләр тәшкилати шимали корейәгә башқурулидиған бомба вә башқа ядро программилири үчүн ишлитидиған нефит мәһсулатлирини експорт қилишқа ембарго қойған иди.

Хитай йәнә шимали корейәниң асаслиқ кирим мәнбәлиридин бири һесаблинидиған тоқумичилиқ мәһсулатлирини киргүзүшни тохтитидиғанлиқини билдүргән вә һазирғичә шимали корейәдин көмүр вә төмүр кан мәһсулатлирини киргүзүшни тохтатқан иди.

Америка авазиниң хәвәр қилишичә, шәнбә күни, шимали корейә ташқи ишлар министири ри йоңхо б д т омуми йиғинда сөз қилғанда, америка президенти доналд трампқа һақарәт қилидиған һуҗум характерлик сөзләрни ейтқан болуп, президент трамп буниңға қаттиқ җаваб қайтуруп,твиттер сәһиписидә: «улар, кичик ракетачиниң ойлирини давамлиқ тәкрарлайдикән, улар узун туралмайду» дегән иди.

Пикирләр (0)
Share
Толуқ бәт