Хитай қирғизистанға селиватқан мәбләғлирини һәссиләп көпәймәктә

Мухбиримиз үмидвар
2016-06-09
Елхәт
Пикир
Share
Принт

Хитай оттура асия дөләтлири билән болған сиясй вә сода - иқтисадий алақилирини күчәйтиш билән биргә йәнә мәбләғ селишниму ашурмақта. Болупму, хитайниң қирғизистанға селиватқан мәблиғи тез сүрәттә ешиватқан болуп, пәрғанә учур ториниң қирғизистан дөләтлик статистика комитетиниң мәнбәлиридин нәқил елишичә, бу йил январдин мартқичә болған арилиқта хитайниң бу дөләткә салған мәблиғи өткән йили бу мәзгилдә салған мәблиғигә қариғанда 15 һәссә ашқан. Әмма, хитайға қариғанда русийә, қазақистан вә түркийәниң қирғизистанға селиватқан мәбләғлири анчә юқири болмиған.

Мәлум болушичә, қирғизситанниң нарин шәһиридә өткүзүлгән «нарин - йипәк йолидики дөләтләр ара иқтисадий өткәл» намлиқ 4 - қетимлиқ хәлқаралиқ мәбләғ селиш мунбири паалийитидә нарин вилайити билән уйғур аптоном райониға тәвә қизилсу қирғиз аптоном области сода, иқтисадий, саяһәт бойичә мәхсус меморандум имзалиған. Хитай тәрәп қирғизистанда семонт завути қуруш, долон тағ давинида чаңға тейилиш мәйдани қуруш, минерал сулуқ аршаңни раваҗландуруп, минерал су мәһсулатлирини тәйярлаш вә башқа көп түрләр бойичә һәмкарлиқ лайиһәлирини оттуриға қойған.

Оттура асия хәвәр мәнбәлиридин мәлум болушичә, хитай йәнә нарин дәрясида су електир истансилири қурулуш лайиһилиригиму мәбләғ селиш ипадисини билдүргән.

Техи өткән айда хитай ташқи ишлар министири ваң йи қирғизистанни зиярәт қилғанда, хитайниң қирғизистан билән сода - иқтисадий алақилирини күчәйтиш һәм қирғизистанниң пишшиқлап ишләпчиқириш санаити мәһсулатлириниң хитайға киргүзүлүш миқдарини ашуруш пикирини оттуриға қойған иди.

Пикирләр (0)
Share
Толуқ бәт