Amérika hökümiti xitayning pochta sistémisidiki imtiyazigha zerbe bermekchi

Muxbirimiz eziz
2018-10-18
Élxet
Pikir
Share
Print

Amérika bilen xitay otturisidiki soda urushining chuqanliri bésilmaywatqanda amérika hökümiti bir yérim esirdin buyan dawam qilip kéliwatqan xelq'ara pochta sistémisidin chékinip chiqmaqchi boluwatqanliqini hemde pochta heqqi toghrisidiki siyasetni özgertmekchi boluwatqanliqini jakarlidi.

Melum bolushiche, mezkur pochta sistémisining belgilimisi boyiche, xitaydin amérikida ewetilidighan posulkilarning pochta heqqi hazirgha qeder izchil eng töwen pochta heqqi ölchimi boyiche hésablinip kélin'gen iken.

Bu heqtiki munazirilerning köpiyishige egiship, aq saraydiki alaqidar xadimlar yéqinda buning "Tengsiz bahani tügitish" ni meqset qilidighanliqini, amérika hökümitining pat arida yéngidin pochta heqqini békitip chiqidighanliqini bildürgen. "Wol-strét zhurnili" gézitining bu heqtiki bash maqaliside körsitilishiche, ilgiriki baha ölchimide xitaydin amérikigha ewetilidighan posulkilarning pochta heqqi oxshash posulkining amérika tewesidiki birer iskilattin bashqa bir sheherge pochtidin ewetilish heqqidin köp erzan'gha chüshidiken. Buning bilen xitaydiki zawutlarning malliri amérika zawutlirining mehsulatlirigha qarighanda amérika bazirida nechche hesse köp sétilidiken. Bu bolsa amérika zawutlirining oborot miqdarigha éghiz ziyanlarni salmaqta iken.

Yene bir yaqtin, erzan pochta heqqi tüpeylidin xitaydin köpligen saxta we süpetsiz mallarmu amérika bazirigha éqip kirmekte iken. Buninggha qoshulup bir qisim qanunsiz buyumlar we zeherlik chékimliklerningmu pochta sistémisi arqiliq amérikigha tarqilishigha yol échilghanliqi melum.

Toluq bet