Җосеф боско хитайда «бир система вә 6 дөләт» бәрпа қилиш һәққидә мақалә елан қилди

Мухбиримиз ирадә
2019-09-03
Елхәт
Пикир
Share
Принт

30-Авғуст күни, америка дөләт мәҗлиси әзалири даимлиқ оқуйдиған «хел», йәни «төпилик» намлиқ гезиттә «хитайниң бәхтияр келәчики-бир система вә 6 дөләт» мавзулуқ бир парчә мақалә елан қилинди.

Мәзкур мақалә 2005-йилидин 2006-йилиғичә америка мудапиә министирлиқида хитай ишлири директори болуп ишлигән вә һазир истратегийә тәтқиқат орунлирида тәтқиқатчи болуп ишләватқан җосеф боско тәрипидин йезилған. У мақалисидә тарихи пакитлардин қариғанда һәрқандақ коммунист партийә һакимийитиниң өмриниң 70 йил болғанлиқини вә һазир хитай компартийәсиниңму дәл өмрини ахирлаштуридиған мәзгилгә кәлгәнликини билдүргән.

У мундақ дегән: «тийәнәнмен мәйдани қирғинчилиқиниң алди вә кәйнидики ғәрбниң тоғра болмиған сиясәтлири түпәйлидин 40 йиллиқ өмрини узартивалған хитай хәлқ җумһурийити ахири өмриниң ахирқи нуқтисиға йетип кәлди. Доналд трамп вә хоңкоң болса униң һалакитиниң қоңғурақ садасидур».

Аптор мақалисидә, америка президенти доналд трамп президент болғандин кейинла дәрһал илгирики президентлардин наһайити пәрқлиқ вә кәскин сиясәтләрни йүргүзгәнликини вә униң шималий корейә вә хитайни әң чоң тәһдит дөләт дәп бекиткәнликини баян қилған. Униң қаришичә, президент трамп хитайға қаритилған сода җаза тәдбирлирини кеңәйтиш билән биргә, американиң җәнубий деңиз вә тәйвән боғузидики тәңпуңлуқни сақлиғучи күчликиниму қәтий йосунда тәкитлигән. У йәнә төвәндикиләрни мундақ баян қилған: «президент трамп қолидики наһайити муһим козурларни йәни хитай коммунист түзүминиң уйғур хәлқигә мәдәнийәт қирғинчилиқи йүргүзүп, уларға зиянкәшлик қилиши вә шундақла хоңкоңдики киризистәк бу муһим козурларни техи хитайға қарши қолланмиди. Әмма һазир сода урушиниң өзила бейҗиңни йетәрлик дәриҗидә тәһдит қиливатиду. . .»

Апторниң баян қилишичә, америка-хитай арисидики бу сода ихтилапиниң хитайға кәлтүрүватқан зийини көрүнәрлик дәриҗидә еғир болуватқан болуп, әгәр бу мушундақ давам қилса, хитайниң дөләт ичидики муқимлиққа селиватқан ғайәт зор мәблиғини шундақла «җуңго арзуси» рамкиси астидики пиланлирини давамлаштуруши мумкин болмай қалидикән.

Хоңкоңниң вәзийитиму хитайниң хәлқара алдида «бир дөләттә икки хил түзүм» вәдисиниң ялғанлиқини ашкарилап қойған болуп, у һазир хитайни қаттиқ әндишигә салмақтикән. Аптор бу һәқтә төвәндикиләрни баян қилған: «хитай ениқки, хоңкоң вә тәйвәнниң демократийә моделиниң хәлқигә, болупму бойсундурулған земинлири болған тибәт вә шәрқий түркистан (шинҗаң) дики хәлқләргә тәсир көрситишидин әнсирәйду. Шуңа улар хитай хәлқиниң өзлири үчүн техиму яхши бир чиқиш йоли барлиқини билишини барлиқ амалларни ишқа селип туруп тосиду».

Аптор җосеф боско мақалисиниң ахирида, хитай һөкүмитиниң уйғурлар вә хоңкоңлуқларға йүргүзүватқан сиясәтлири вә башқа нурғун ички вә ташқи сиясәтлиридин қариғанда хитайға бесим қилидиған вақит йетип кәлгәнликини тәкитлигән шуниңдәк хитайда демократийәдин ибарәт бир система вә 6 дөләт бәрпа қилишниң әң тоғра йол болидиғанлиқини баян қилған.

У мақалисидә «мустәқил хоңкоң, тәйвән, шәрқий түркистан, моңғулийә, тибәт» ләрни тилға елип, мана буниң 1 милярд 400 милйон хәлқ һәқиқәтән қарши алидиған «җуңго арзуси» икәнликини баян қилған.

Пикирләр (0)
Share
Толуқ бәт