Хитайниң әнглийәдики уйғурларға қарита җасуслуқ һәрикити елип бериватқанлиқи илгири сүрүлди

Мухбиримиз әркин
2020-05-15
Елхәт
Пикир
Share
Принт

Америкадики «вайис» агентлиқи хитай һөкүмитиниң әнглийәдики уйғурларға қарита җасуслуқ һәрикити елип берип, уларни назарәт қиливатқанлиқини илгири сүрди.

Мәзкур агентлиқиниң 15-май елан қилған хәвиридә бурун әнглийәдики уйғурларниң һәр айда бир қетим паалийәт өткүзүп, йемәк-ичмәк, миллий кийим-кечәк вә сәнәти арқилиқ өзлириниң иттипақлиқини намаян қилип кәлгәнлики, бирақ һазир бу хил паалийәтләрниң пүтүнләй тохтиғанлиқини билдүргән.

Хәвәрдә тәкитлишичә, бу паалийәтниң тохтап қелишиға һазирқи карантин сәвәб болмиған, бәлки җасусларниң уйғур җәмийитигә сиңип кирип, кишиләрниң һаятиға тәһдит пәйда қиливатқанлиқ сәвәб болған икән. Хәвәрдә әнглийәдики уйғур җәмийитигә сиңип киргән хитай җасуслириниң кимлики тилға елинмиған, лекин «қорқунч вә гуманхорлуқ җамаәтниң бөлүнүшини кәлтүрүп чиқарғанлиқи» ни билдүргән.

Хәвәрдә нурғун паалийәтләргә мунасивәтсиз яки намәлум уйғурлар тәклип қилинип, паалийәтләрниң «қизиллишип» кәткәнлики, хитай даирилириниң ғәрб әллиридики уйғурларға өз җамаитиниң учурлирини йәткүзүп бериш бәдилигә уларниң юртидики уруқ-туғқанлирини қоғдашқа вәдә беридиғанлиқи билдүрүлгән.

Хәвәрдә қәйт қилинишичә, нурғун кишиләр хитайниң бесими вә уруқ-туғқанлиридин әндишә қилип сүкүт қилиш йолини таллиған болсиму, лекин керим заһир вә униң қизи дил заһирдәк тәһдит вә зораванлиққа баш әгмигән уйғурларму бар икән.

Пикирләр (0)
Share
Толуқ бәт