Sabiq CIA xadimi chün shingli xitay üchün xizmet qilghanliqini étirap qilghan

Muxbirimiz irade
2019-05-02
Élxet
Pikir
Share
Print

Amérika merkizi axbarat idarisi, yeni CIA ning sabiq xadimi jérriy chünning esli ismi chün shingli bolup, u özining xitay hökümiti üchün xizmet qilghanliqini étirap qilghan.

Chün shingli 2018-yilining béshida nyu-yorktiki kénnédi xelq'ara ayrodromida qolgha chüshken. U xitayning amérika istixbarat torini chöktürüshige hemkarlishish gumani bilen resmiy qolgha élin'ghan idi. 

B b s xewer agéntliqining bu heqtiki xewirige qarighanda, jérriy chün 2007-yili amérika merkizi axbarat idarisidin ayrilghandin kéyin xongkongda yashashqa bashlighan we shundin kéyin xitay istixbarati üchün xizmet qilghan. U asasliq amérikaning mexpiy istixbarat xadimlirining kimlikini éniqlash wezipisini üstige alghan.
Amérika edliye da'irilirining bayan qilishiche, xitay millitidin bolghan we kéyin amérika puqraliqigha ötken jérriy chün amérikaning xitaydiki texminen 20 etrapida mexpiy xadimining öltürülüshi we qamaqqa élinishi, netijide 2010-2012-yilliri arisida amérikaning xitaydiki istixbarat torining weyran bolushigha yol échip bergen. 

Bu yil 54 yashliq jérriy chün 1994‏-yilidin 2007‏-yilighiche amérika istighbaratida xizmet qilghan, 2007‏-yili xongkonggha köchüp ketken jérri chün 2012‏-yili amérikagha kelgende yénida amérikaning dölet mexpiyetlikige a'it bir barmaq diska tépilghan. Uningda amérika merkizi axbarat idarisining xitayda yashawatqan mexpiy xadimlirining heqiqiy isimliki, téléfon nomurliri we ish-emelliri yézilghan iken. Shexslerning bu xil uchurlarni saqlishi amérika qanunida cheklen'gen bolghachqa, uning üstige jérri chün mezkur xatirini xizmet ornidin ayrilip 5 yildin kéyinmu yénida kötürüp yürgen bolghachqa neq meydanda tutqun qilinip soraqqa tartilghan. Biraq u bu matériyallarni xitaygha bermigenlikini ilgiri sürgenliki üchün qoyuwétilgen iken. 

Biraq amérika merkiziy axbarat idarisining ehwalni ilgirilep tekshürüshi netijiside u axiri 2018-yili 1-ayda qayta qolgha élin'ghan. Amérika edliye da'iriliri uning weqesini "Amérika dölitige we öz xizmetdashlirigha qilin'ghan tiragédiyelik satqunluq" dep süretligen. Uning sot hökümi bu yil 8-ayda élan qilinidiken.

Pikirler (0)
Share
Toluq bet