Сабиқ CIA хадими чүн шиңли хитай үчүн хизмәт қилғанлиқини етирап қилған

Мухбиримиз ирадә
2019-05-02
Елхәт
Пикир
Share
Принт

Америка мәркизи ахбарат идариси, йәни CIA ниң сабиқ хадими җеррий чүнниң әсли исми чүн шиңли болуп, у өзиниң хитай һөкүмити үчүн хизмәт қилғанлиқини етирап қилған.

Чүн шиңли 2018-йилиниң бешида ню-йорктики кеннеди хәлқара айродромида қолға чүшкән. У хитайниң америка истихбарат торини чөктүрүшигә һәмкарлишиш гумани билән рәсмий қолға елинған иди. 

Б б с хәвәр агентлиқиниң бу һәқтики хәвиригә қариғанда, җеррий чүн 2007-йили америка мәркизи ахбарат идарисидин айрилғандин кейин хоңкоңда яшашқа башлиған вә шундин кейин хитай истихбарати үчүн хизмәт қилған. У асаслиқ американиң мәхпий истихбарат хадимлириниң кимликини ениқлаш вәзиписини үстигә алған.
Америка әдлийә даирилириниң баян қилишичә, хитай миллитидин болған вә кейин америка пуқралиқиға өткән җеррий чүн американиң хитайдики тәхминән 20 әтрапида мәхпий хадиминиң өлтүрүлүши вә қамаққа елиниши, нәтиҗидә 2010-2012-йиллири арисида американиң хитайдики истихбарат ториниң вәйран болушиға йол ечип бәргән. 

Бу йил 54 яшлиқ җеррий чүн 1994‏-йилидин 2007‏-йилиғичә америка истиғбаратида хизмәт қилған, 2007‏-йили хоңкоңға көчүп кәткән җерри чүн 2012‏-йили америкаға кәлгәндә йенида американиң дөләт мәхпийәтликигә аит бир бармақ диска тепилған. Униңда америка мәркизи ахбарат идарисиниң хитайда яшаватқан мәхпий хадимлириниң һәқиқий исимлики, телефон номурлири вә иш-әмәллири йезилған икән. Шәхсләрниң бу хил учурларни сақлиши америка қанунида чәкләнгән болғачқа, униң үстигә җерри чүн мәзкур хатирини хизмәт орнидин айрилип 5 йилдин кейинму йенида көтүрүп йүргән болғачқа нәқ мәйданда тутқун қилинип сораққа тартилған. Бирақ у бу материялларни хитайға бәрмигәнликини илгири сүргәнлики үчүн қоюветилгән икән. 

Бирақ америка мәркизий ахбарат идарисиниң әһвални илгириләп тәкшүрүши нәтиҗисидә у ахири 2018-йили 1-айда қайта қолға елинған. Америка әдлийә даирилири униң вәқәсини «америка дөлитигә вә өз хизмәтдашлириға қилинған тирагедийәлик сатқунлуқ» дәп сүрәтлигән. Униң сот һөкүми бу йил 8-айда елан қилинидикән.

Толуқ бәт