С җ верлимән: «мусулманларниң хитайға қарши ортақ байқути хитайни лагерларни тақашқа мәҗбурлайду»

Мухбиримиз ирадә
2019-07-08
Елхәт
Пикир
Share
Принт

Америкадики тонулған обзорчи вә тәтқиқатчи с җ верлемән дунядики барлиқ мусулманларни уйғурлар үчүн һәрикәткә өтүшкә чақирди.

У, «екистра хәвәрләр» намлиқ тор бәттә 4-июл күни мақалә елан қилип, уйғур елидики мусулманлар учраватқан зулумға сәуди әрәбистан, пакистан вә һәтта түркийә қатарлиқ чоң мусулман дөләтлириниң рәһбәрлири хитайдин қорқуп, сүкүт қиливатқан бир пәйттә вәзипиниң әмди мусулман хәлқниң зиммисигә чүшкәнликини әскәрткән.

С җ верлимәнниң қаришичә, дуня нопусиниң 25 пирсәнтини тәшкил қилидиған вә нопуси 1 милярд 600 милйондин ашидиған мусулман хәлқи әгәр бирликтә хитайни иқтисадий вә мәдәнийәт җәһәттин байқут қилса, чоқум нәтиҗиси чиқидикән. Униң қаришичә, буниңға дунядики мусулманларниң исраилийәгә қарши пәләстинни тинчлиқ йоллири билән қоллаш һәрикити яхши бир үлгә болалайдикән.

С җ верлимән мақалисидә, буниң үчүн дунядики барлиқ мусулманларниң хитай иқтисадида зор тәсир күчи болған хуавей, оппо вә виво қатарлиқ ширкәтлириниң мәһсулатлири вә линово қатарлиқ техника мәһсулатлири шундақла йәнә хитайниң AirChina , China Eastern қатарлиқ һава йоллириға қарита байқут елан қилиши керәкликини билдүргән.

У йәнә, хитай һөкүмитиниң уйғур елидики мусулманларни езишигә шерик болуватқан волкисвагин, кирафт һейнз, адидас қатарлиқ чәтәл маркилириниңму охшашла байқут қилиниши керәкликини әскәрткән.

У сөзидә, хитай иқтисадий давалғуш ичидә туруватқан вә америка һөкүмитиму хитайға қарши бир қисим иқтисадий җаза тәдбирлирини йолға қоюватқан бир пәйттә, бир йерим милярдтин артуқ кишиниң ортақ һәрикитиниң чоқум хитай һөкүмитини уйғур мусулманлириға қаратқан муамилисини өзгәртишкә, җүмлидин йиғивелиш лагерлирини тақашқа мәҗбурлиялайдиғанлиқини баян қилған.

Пикирләр (0)
Share
Толуқ бәт