Bir xitay herbiy ofitséri wiza aldamchiliqi bilen amérikida qolgha élin'ghan

Muxbirimiz jüme
2020-06-14
Élxet
Pikir
Share
Print

Bir xitay herbiy ofitséri wiza aldamchiliqi bilen amérikida qolgha élin'ghan. Eger uning jinayiti delillense 10 yilliq késilishi mumkin iken.

Bu heqtiki xewerlerge qarighanda, wang shin isimlik mezkur xadim xitay azadliq armiyesining mayor derijiliki ofitséri bolup, u sanfri'ansisko shehiridiki kaliforniye uniwérsitétigha tetqiqatchi süpitide kelgen.

FBI Bu heqte turghuzghan jinayi shikayette uning ta hazirghiche xitay azadliq armiyesidin ma'ash élip kelgenlikni bildürülgen.

U, 2018-yili amérika wizisini iltimas qilish jedwilige özining xitay azadliq armiyesi bilen bolghan munasiwitini qesten yoshurghan we jedwelge 2002-yilidin 2016-yilighiche azadliq armiyesining sehiye saheside dotsént bolup ishligenlikini yazghan iken. 

U amérikidin qaytishida yénidin tépilghan bezi tetqiqat uchurliri amérika sehiye ministirliqi meblegh salghan tetqiqat türlirige a'it matériyallar iken. 

Wang los anjilis xelq'ara ayrodromidin tyenjin'ge qarap yolgha chiqish aldida qolgha élin'ghan. U amérika chégra qoghdash xadimlirigha özining xitay herbiy uniwérsitéti tejribixanisining diréktorning yolyoruqigha asasen shundaq qilghanliqini, amérikidiki tejribixanining layihesige a'it uchurlarni xitay élip kélishke buyrulghanliqini iqrar qilghan.

Melum bolushiche, amérika chégra qoghdash da'iriliri wangning ilgiri tejribixana uchurliri we tetqiqat matériyallirini xitaydiki xizmetdashlirigha élxet arqiliq yollighanliqi we bir qisim matériyallarni élip xitaygha qaytishqa temshiliwatqanliqigha a'it yip uchi tapshurup alghan iken.

Halbuki, FBI ning wang üstidin sun'ghan shikayetnamide uning peqet wiza aldamchiliqi jinayiti artilghan bolsimu, uning sana'et jasusluqi bilen shughullan'ghanliqi tilgha élinmighan.

Xitayning amérikigha qaritilghan soda mexpiyetliki jasusluqi yillardin béri barghanche roshen ashkarilinishqa bashlighan.

Bu yil 29-may amérikida prézidénti donald tramp amérikigha kélidighan xitay oqughuchilar we ziyaretchi alimlarning amérika bixeterlikige ziyan salidighanliqi guman qilinsa ularning birdek cheklinidighanliqini élan qilghan idi.

Toluq bet