Xelq'ara kechürüm teshkilati: amérika xitaydiki Uyghurlarni qoghdashta tarixiy qedem tashlidi

Muxbirimiz nur'iman
2020-06-19
Élxet
Pikir
Share
Print

Prézidént tramp 17-iyun 2020-yilliq Uyghur kishilik hoquq siyasiti qanun layihesige imza qoyup resmiy qanunlashturdi. Amérikaning béyjingda turushluq elchixanisi ashu küni xitayche bayanat élan qilip Uyghur kishilik hoquq siyasitining qanunlashqanliqini xitay hökümitige resmiy uqturdi. Amérika hökümitining Uyghur kishilik hoquq qanunini resmiy qanunlashturushi we buningdin kéyin bu qanunni ijra qilidighanliqini bildürüshi xitayni qattiq sarasimgha salghan bolup, xitay hökümiti buninggha qarshi özini aqlash we amérikani eyibleshke kirishti.

Xitay hökümitining döletlik téléwiziyesi amérikaning "2020-Yilliq Uyghur kishilik hoquq siyasiti qanun layihesi" ni resmiy qanunlashturushini "Uzun bileklik maymunlarning xitayni qalaymiqanlashturush üchün qollan'ghan oyuni" dégen haqaretlik sözler bilen küchlük naraziliqini ipadilidi.

Bu qanunning resmiy imzalinishi xelq'araliq kishilik hoquq teshkilatliri, Uyghur teshkilatliri we keng Uyghurlarning alqishigha érishken bolup, amérikadiki xelq'ara kechürüm teshkilatining teshwiqat we hökümet ishlirigha mes'ul diréktori jo'an lin bayanat élan qilip: prézidént trampning. Imza qoyushini "Uyghurlarni qoghdashtiki tarix bir qedem" dep atidi.

Bayanatta yene mundaq déyilgen: "Bu tarixiy xaraktérlik qanun arqiliq, amérika hökümiti Uyghurlarni qiynash, tutqun qilish, uzun muddet qanunsiz tutup turush qilmishliri we bashqa kishilik hoquqqa dexli-teriz qilghan shexslerni éniqlap chiqip, ulargha jaza tedbirliri qollinidu."

Xelq'ara kechürüm teshkilati 2017-yilidin buyan Uyghurlarning lagérlargha qamilishi, xitayning Uyghurlargha yürgüzgen dehshetlik qiyin-qistaqliri we muhajirettiki Uyghurlargha tehdit sélish qilmishlirigha a'it nurghun uchurlarni tekshürüp, éniqlap chiqip dunyagha ashkarilighanidi.

Toluq bet