"Wuxen wirusi" tarqalghan rayondin amérikagha kelgen xitay oqughuchilar derske kirgüzülmigen

Muxbirimiz jüme
2020-01-23
Élxet
Pikir
Share
Print

"Wuxen wirusi" dep tonulghan yuqumluq nepes yoli wirusi dunyawi endishe peyda qiliwatqan mezgilde wirginiye shtatining fayrfaks nahiyesige kelgen xitay oqughuchilarning derske kirgüzülmigenliki ilgiri sürülmekte.

Xewerlerge qarighanda, xitayning xubéy ölkisi wuxen shehiri "Wuxen wirusi" dep atiliwatqan yuqumluq késel tarqalghan we yuqumlinish eng éghir bolghan rayonlarning biri.

Xitaydin öz-ara almashturush programmisi boyiche fayrfaks nahiyesige kelgen 21 neper oqughuchi xubéy ölkisining yichang shehiridin bolup, ular ötken 48 sa'et ichide nyu-york kénnédiy xelq'ara ayrodromi arqiliq amérikagha kirgen iken. 

Bularning hemmisi 12 yashliq ösmürler bolup bulargha yene 5 neper chong kishimu hemrah bolup kelgen.

Ularning beziliri falls church shehirige qarashliq longfellow ottura mektipige tewe mehellidiki a'ililerge yerleshtürülgen iken.

"Wuxen wirusi" endishisi tüpeyli fayrfaks nahiyelik ma'arip idarisi qarar chiqirip, bu balilarni mektep programmisigha waqtinche qatnashturmasliqni qarar qilghan.

Mezkur ottura mektepning mudiri karol kim ata-anilargha yollighan mektupida sehiye xadimlirining bahasini neqil keltürüp turup: "Bu oqughuchilardin wirus yuqush xetirining yoq déyerlik ikenlikini, emma shundaqtimu bundaq bir qararni élishini zörür dep qarighanliqi" ni bildürgen.

Bu oqughuchilar programma kün tertipi boyiche 22-yanwardin 29-yanwarghiche, longfellow ottura mektipide derske qatnishishqa orunlashturulghan iken.

Esli almashturush programmisi boyiche, mezkur mekteptinmu bir qisim oqughuchlarni bu yil aprélda xbéyning yichang shehirige ewetish pilan qilin'ghan. Emma bu pilaning yenila küchke ige yaki emesliki hazirche éniq emes iken.

"Wuxen wirusi" dep atalghan bu wirus bayqalghandin ta hazirghiche 17 ademning jénigha zamin bolghandin bashqa, peqet xitaydila 634 ademning bu wirus bilen yuqumlan'ghanliqi bayqalghan.

Pikirler (0)
Share
Toluq bet