"Washin'gton pochtisi" géziti: "Eger xitay amérika bilen munasiwetni yaxshilaymen dése aldi bilen özini ongshishi kérek"

Muxbirimiz nur'iman
2020-06-19
Élxet
Pikir
Share
Print

"Washin'gton pochtisi" géziti 18-iyun élan qilghan maqaliside béyjing da'irilirining amérika bilen téximu yaxshi munasiwet ornitishni xalaydighanliqini bildürgen. Xewerde "Amérika bilen munasiwetni yaxshilashning birdin-bir yoli xitayning yaxshi bir 'dunya puqrasi' bolushidur, undaq bolmighanda, amérika-xitay munasiwetliridiki jiddiychilik dawamliq küchiyip baridu," déyilgen.

Xewerge asaslan'ghanda, amérika tashqi ishlar ministiri mayik pompéyo 17-iyun béyjing terepning telipi boyiche xitay diplomati yang jyéchi bilen hawayda körüshken. Xitay terep korona wirusi tarqalghandin buyan ikki terepning munasiwitining nacharlashqanliqi we xitayning bu munasiwetni yaxshilashning yollirini izdewatqanliqini otturigha qoyghan.

"Washin'gton pochtisi" gézitining xewiride mundaq déylgen: "Prézidént tramp Uyghurlarni tejribe ornida qattiq basturushta qoli bar her qandaq bir xitay emeldarini jazalaydighan qanun'gha imza qoydi. Xitay buni 'yaman gherezlik hujum' dep atidi. Lékin bu qanun mutleq üstün awaz bilen maqulluqtin ötti. Emdi washin'gton xitaydiki wehshiyliklerge qarshi heriket bashlaydu."

Xewerde yene xitay diplomatining hawaygha kélip amérika tashqi ishlar ministiri mayk pompéyo bilen körüshüshi xitayning özining xelq'aradiki obrazini yaxshilashqa urunuwatqanliqidek bir ré'alliqnimu ashkarilaydighanliqi eskertilgen.

Prézidént tramp 27-mart axirqi qétim xitay re'isi shi jinping bilen téléfon söhbiti ilip barghandin buyan, uning bilen qayta sözlishishni izchil ret qilip kelgen idi. Buning bilen xitayning "Ikki döletning yariship qélishi" üchün körsetken urunushliri bikar bolghan idi.

Amérikaning xongkong we Uyghurlarni qollishi seweblik xitayning dölet téléwiziyeliride yéqindin buyan amérikagha qarshi teshwiqatlar kücheygen. Xitay hökümet taratquliri ochuq-ashkara halda "Rezil", "Peskesh", "Insaniyetning düshmini" dégendek sözler bilen amérika tashqi ishlar ministiri mayik pompéyogha hujum qilghan.

Toluq bet