«Вашингтон почтиси» гезити: «әгәр хитай америка билән мунасивәтни яхшилаймән десә алди билән өзини оңшиши керәк»

Мухбиримиз нуриман
2020-06-19
Елхәт
Пикир
Share
Принт

«Вашингтон почтиси» гезити 18-июн елан қилған мақалисидә бейҗиң даирилириниң америка билән техиму яхши мунасивәт орнитишни халайдиғанлиқини билдүргән. Хәвәрдә «америка билән мунасивәтни яхшилашниң бирдин-бир йоли хитайниң яхши бир ‹дуня пуқраси' болушидур, ундақ болмиғанда, америка-хитай мунасивәтлиридики җиддийчилик давамлиқ күчийип бариду,» дейилгән.

Хәвәргә асасланғанда, америка ташқи ишлар министири майик помпейо 17-июн бейҗиң тәрәпниң тәлипи бойичә хитай дипломати яң җйечи билән һавайда көрүшкән. Хитай тәрәп корона вируси тарқалғандин буян икки тәрәпниң мунасивитиниң начарлашқанлиқи вә хитайниң бу мунасивәтни яхшилашниң йоллирини издәватқанлиқини оттуриға қойған.

«Вашингтон почтиси» гезитиниң хәвиридә мундақ дейлгән: «президент трамп уйғурларни тәҗрибә орнида қаттиқ бастурушта қоли бар һәр қандақ бир хитай әмәлдарини җазалайдиған қанунға имза қойди. Хитай буни ‹яман ғәрәзлик һуҗум' дәп атиди. Лекин бу қанун мутләқ үстүн аваз билән мақуллуқтин өтти. Әмди вашингтон хитайдики вәһшийликләргә қарши һәрикәт башлайду.»

Хәвәрдә йәнә хитай дипломатиниң һавайға келип америка ташқи ишлар министири майк помпейо билән көрүшүши хитайниң өзиниң хәлқарадики образини яхшилашқа урунуватқанлиқидәк бир реаллиқниму ашкарилайдиғанлиқи әскәртилгән.

Президент трамп 27-март ахирқи қетим хитай рәиси ши җинпиң билән телефон сөһбити илип барғандин буян, униң билән қайта сөзлишишни изчил рәт қилип кәлгән иди. Буниң билән хитайниң «икки дөләтниң яришип қелиши» үчүн көрсәткән урунушлири бикар болған иди.

Американиң хоңкоң вә уйғурларни қоллиши сәвәблик хитайниң дөләт телевизийәлиридә йеқиндин буян америкаға қарши тәшвиқатлар күчәйгән. Хитай һөкүмәт таратқулири очуқ-ашкара һалда «рәзил», «пәскәш», «инсанийәтниң дүшмини» дегәндәк сөзләр билән америка ташқи ишлар министири майик помпейоға һуҗум қилған.

Пикирләр (0)
Share
Толуқ бәт