Xitay da'iriliri aqtu nahiyisidin yene 1500 tütün a'ilini bashqa jaygha köchürgen

Muxbirimiz erkin
2018-12-10
Élxet
Pikir
Share
Print

Xitay da'irilirining "Namratliqtin qutquzush" namida élip bériwatqan Uyghur élining jenubiy chégrasidiki taghliq yéza-kentlerning yerlik ahalilirini bashqa jaylargha köchürüsh pilani téz süret bilen ijra qilinmaqta iken.

Xitay hökümitining mezkur pilani ilgiri Uyghur kishilik hoquq teshkilatlirining tenqidige uchrighan. Ular hökümetning bu ahalilerni en'eniwi turmush usulidin yiraqlashturup, ularni katektek bina öylerge orunlashturushining ularni téximu weyranchiliqqa élip baridighanliqini agahlandurghan. Biraq da'iriler bu agahlandurushqa qulaq salmay, yéqindin béri köchürüshni téximu tézletken.

"Qizilsu géziti" ning 10‏-dékabirdiki xewiride ashkarilishiche, da'iriler bu yil 3‏-ayda aqtu nahiyisining qiziltagh, charlong, muji taghliq yéziliridin 1500 tütün ahalini aqtu nahiye baziridiki bir ahaliler olturaq rayonigha köchürüp kélip, her bir tütün a'ilini kölimi 60 kwadrat métirdin 80 kwadrat métirghiche bolghan bina öylerge orunlashturghan. Xewerde charwichilarning bu arqiliq "Namratliqtin qutulup, tedrijiy béyish yoligha qarap mangghanliqi" ilgiri sürülgen.

Aqtu nahiyisi ötken yildin béri xitay da'irilirining taghliq yéza-kentlerdiki yerlik ahalilerni bashqa jaylargha köchürüsh shuningdek xitay ölkiliridin köplep xizmetchi qobul qilishtiki nishanliq nahiyisi bolup keldi. Bolupmu bu yil kirgendin béri asasliq köchürülüsh nishani bolup keldi. Da'iriler ötken ayda aqtu nahiyisining xantérek taghliq kenti we aqdala charwichiliq meydanidiki qirghiz ahalilerni nahiye bazirining etrapigha köchürgen. Aqdala kentining özidinla 258 tütün qirghiz, Uyghur charwichi ahalini köchürülgen idi. Közetküchilerning qarishiche, xitay hökümiti namratliqtin qutquzushni bahane qilsimu, lékin uning istratégiyilik pilani-yerlik ahalilerni chégra boyidiki taghliq rayonlardin, bolupmu "Qeshqer-gwadar iqtisadi karidori" gha yéqin rayonlardin yiraqlashturush iken.

Toluq bet