Хитай даирилири ақту наһийисидин йәнә 1500 түтүн аилини башқа җайға көчүргән

Мухбиримиз әркин
2018-12-10
Елхәт
Пикир
Share
Принт

Хитай даирилириниң «намратлиқтин қутқузуш» намида елип бериватқан уйғур елиниң җәнубий чеграсидики тағлиқ йеза-кәнтләрниң йәрлик аһалилирини башқа җайларға көчүрүш пилани тез сүрәт билән иҗра қилинмақта икән.

Хитай һөкүмитиниң мәзкур пилани илгири уйғур кишилик һоқуқ тәшкилатлириниң тәнқидигә учриған. Улар һөкүмәтниң бу аһалиләрни әнәниви турмуш усулидин йирақлаштуруп, уларни катәктәк бина өйләргә орунлаштурушиниң уларни техиму вәйранчилиққа елип баридиғанлиқини агаһландурған. Бирақ даириләр бу агаһландурушқа қулақ салмай, йеқиндин бери көчүрүшни техиму тезләткән.

«Қизилсу гезити» ниң 10‏-декабирдики хәвиридә ашкарилишичә, даириләр бу йил 3‏-айда ақту наһийисиниң қизилтағ, чарлоң, муҗи тағлиқ йезилиридин 1500 түтүн аһалини ақту наһийә базиридики бир аһалиләр олтурақ райониға көчүрүп келип, һәр бир түтүн аилини көлими 60 квадрат метирдин 80 квадрат метирғичә болған бина өйләргә орунлаштурған. Хәвәрдә чарвичиларниң бу арқилиқ «намратлиқтин қутулуп, тәдриҗий бейиш йолиға қарап маңғанлиқи» илгири сүрүлгән.

Ақту наһийиси өткән йилдин бери хитай даирилириниң тағлиқ йеза-кәнтләрдики йәрлик аһалиләрни башқа җайларға көчүрүш шуниңдәк хитай өлкилиридин көпләп хизмәтчи қобул қилиштики нишанлиқ наһийиси болуп кәлди. Болупму бу йил киргәндин бери асаслиқ көчүрүлүш нишани болуп кәлди. Даириләр өткән айда ақту наһийисиниң хантерәк тағлиқ кәнти вә ақдала чарвичилиқ мәйданидики қирғиз аһалиләрни наһийә базириниң әтрапиға көчүргән. Ақдала кәнтиниң өзидинла 258 түтүн қирғиз, уйғур чарвичи аһалини көчүрүлгән иди. Көзәткүчиләрниң қаришичә, хитай һөкүмити намратлиқтин қутқузушни баһанә қилсиму, лекин униң истратегийилик пилани-йәрлик аһалиләрни чегра бойидики тағлиқ районлардин, болупму «қәшқәр-гвадар иқтисади каридори» ға йеқин районлардин йирақлаштуруш икән.

Пикирләр (0)
Share
Толуқ бәт