Уйғур «йеза ешинча әмгәк күчлири» райондики хитай деһқанлириниң йәрлиридә ишләшкә орунлаштурулған

Мухбиримиз үмидвар
2019-03-27
Елхәт
Пикир
Share
Принт

Хитай даирилириниң уйғур «йеза ешинча әмгәк күчлири» ни ишқа орунлаштуруш саһәсини кеңәйтип, уйғур деһқанлирини райондики хитай көчмәнлириниң йәрлирини теришқа йүзләндүрүватқанлиқи мәлум. «Ақсу гезити» ниң 26‏-март хәвиридә ашкарилишичә, йәрлик даириләр 22‏-март күни шаяр наһийисиниң қизил байрақ базири йәкшәнбәбазар кәнтидә әмгәк күчи йәрмәнкиси өткүзүп, әмгәк күчигә еһтияҗлиқ хитай терилғу йәр игилирини уйғур «йеза әмгәк күчлири» билән тәминлигән. Хитай даирилири буни уйғур «йеза ешинча әмгәк күчлири» ниң пул тепип намратлиқтин қутулуши үчүн зор пурсәт, дәп көрсәтсиму, лекин көзәткүчиләр буниң уйғур йеза әмгәк күчлирини хитай терилғу йәр игилиригә беқинди һаләткә кәлтүрүп қойидиғанлиқини агаһландурмақта. Хәвәрдә баян қилинишичә, йәрмәнкидә бәзи уйғур деһқанлири хитай йәр игилиригә ялланған. Йәрмәнкидә бир хитай йәр игисигә ялланған тохти исимлик бир уйғур деһқан өзиниң пәқәт 8. 8 Мола йери барлиқи, бу қетим аяли билән бир хитай йәр игисиниң 300 мо йерини теришқа ялланғанлиқини билдүргән. Хәвәрдә тәкитлинишичә, қизил байрақ базириниң борқай кәнтидә 1500 мо терилғу йери бар бир хитай деһқан, йәни йәр игиси бу йил 61 ишчиға еһтияҗлиқ икәнлики, бу йәрмәнкә өзиниң әмгәк күчигә болған еһтияҗини қандурушиға қулайлиқ яритип бәргәнликини тәкитлигән. Бу хитай йәр игисиниң 1500 мо йәргә қандақ еришкәнлики мәлум әмәс. Лекин уйғур көзәткүчилириниң илгири сүрүшичә, хитай даирилири 2017‏-йилдин бери нурғун уйғур йәр игилирини йиғивелиш лагерлириға қамап, уларниң ачқан терилғу йәрлирини мусадирә қилған. Мусадирә қилинған бу терилғу йәрләрни хитай көчмәнлиригә вә башқиларға қайтидин бөлүп бәргән. Ақсу вилайити йеқинда вилайәт миқясидики 5 милйон 700миң модәк терилғу йәрниң игилик һоқуқ тәвәликини қайта бекитип тәқсим қилинғанлиқини билдүргән иди. Хитай мәтбуатлири 2018-йили уйғур диярида көплигән йәрләрни игилиридин мусадирә қилип, тизимлап, өткүзүвалғанлиқи вә бу йәрләрниң қайтидин тәқсим қилинғанлиқини билдүргән иди. Көзәткүчиләрниң илгири сүрүшичә, хитай һөкүмитиниң уйғур «йеза ешинча әмгәк күчлири» ни тәшкиллик ишқа орунлаштуруши уйғурларни контрол қилиштики бир хил муқимлиқ тәдбири икән.

Пикирләр (0)
Share
Толуқ бәт