Хитай даирилири уйғур дияриға хитай өлкилиридин йәнә зор түркүмдә оқутқучи қобул қилмақчи болған

Мухбиримиз сада
2019-06-18
Елхәт
Пикир
Share
Принт

Уйғур аптоном район даирилири бу йил йәнә хитайниң ичкири өлкилиридин зор түркүмдә оқутқучи қобул қилишқа киришкән болуп, бу йил хитай маарип министирлиқи өзи биваситә «шинҗаң вә тибәткә 10 миң оқутқучи әвәтиш пилани» бойичә иккинчи түркүмдә зор сандики оқутқучиларни уйғур дияридики йеза-базар вә кәнтләргә әвәтишни пиланлиған.

Шинхуа ториниң 18-июндики хәвиригә қариғанда, хитай даирилири өзиниң бу пиланиниң уйғур дияриниң «асасий қатлимидики йеза-базар вә кәнтләргә оқутқучи йетишмәслик мәсилисини һәл қилиш үчүн елинған тәдбири» икәнликини чүшәндүргән. 

Мәлум болушичә, уйғур дияриниң һәр қайси наһийәлиридики маарип тармақлири изчил елан чиқирип, ичкири хитайдин зор түркүмдә оқутқучи қобул қилидиғанлиқи, буларниң мааш вә тәминатиниң юқири болидиғанлиқини тәшвиқ қилип кәлгәниди. Нөвәттә, уйғур дияридики барлиқ уйғур мәктәплиридики уйғур тили маарип әмәлдин қалдурулуп, оқутқучилар қошунини асасән хитайлар игиләватқанлиқи мәлум болмақта. 

Хәвәрдә көрситилишичә, бу хитай маарип министирлиқиниң «шинҗаңға 10 миң оқутқучи әвәтиш пилани» ниң иккинчи түркүми болуп, бу пилан бойичә, хитайниң ичкири өлкилиридин уйғур дияриниң асасий қатлимиға әвәтилидиған хадимлар 5000 нәпәр оқутқучини өз ичигә алидикән. 

Хәвәрдә дейилишичә, уйғур аптоном даирилири бу йил райондики оқутқучи қобул қилиш көлимини 19 миң 900 адәмгә кеңәйтидикән. Униңдин башқа йәнә 4000 нәпәр алий мәктәп оқуғучисини уйғур дияриниң йеза-кәнт районлириға практика қилиш үчүн әвәтип, районниң практика оқутқучи қошунини кеңәйтидикән. 

Нөвәттә уйғур диярида икки милйондин артуқ уйғур, қазақ вә башқа милләт кишилири хитайниң җаза лагерлириға қамалған болса, лагер сиртидики яшларниң бир қисми аталмиш «йеза ешинча әмгәк күчи» намида ичкири өлкиләргә йөткәлгән. Әмдиликтә уйғур дияриниң асасий қатлимиға «оқутқучи йетишмәслик» намида ичкири өлкиләрдин хадимларниң көпләп әвәтилиши көзәткүчиләрниң диққитини қозғиған. 

Уйғур көзәткүчилириниң қаришичә, һазир хитай һөкүмити хитай тилидики маарипни районда кәң омумлаштуруп, уйғур тилини маарип, пән-техника вә мәмурий саһәдин пүтүнләй сиқип чиқириш муддиасиға йәтмәктә. Әмәлийәттә болса, хитайниң миллий територийәлик аптономийә қануни вә башқиларда уйғур тилиниң шинҗаң уйғур аптоном райониниң һөкүмәт, маарип вә башқа саһәлиридики ишлитиш һоқуқи етирап қилинған болсиму, һазир хитай даирилири өз қанунлириға өзлири хилаплиқ қилмақтикән.

Пикирләр (0)
Share
Толуқ бәт