Bir qazaq a'ilisidin 5 kishining jazagha uchrighanliqi melum

Muxbirimiz jüme
2020-01-23
Élxet
Pikir
Share
Print

Bir sen'et xumar qazaq a'ilisining xitayning lagér siyasiti sewebidin parchilan'ghanliqi, bir a'ilidin az dégende 3 kishining tutqunda, ikki kishining nezerbente ikenliki melum.

"Dunyawi sadalar" namliq tor bétining xewer qilishiche, nöwette qazaqistanda yashawatqan gul'aysha oralbay xitayda qalghan qérindashlirining héch iz-dérikini alalmighan.

Xewerde körsitishiche, uning küytun shehiride yashaydighan chong akisi dilshatning 7 din 15 yilliqqiche késilgenlikige a'it uchur bar iken. Uning baqila we baqtiguk isimlik ikki singlisi 2018-yilining may aylirida lagérgha élip kétilgen.

Uningdin bashqa uning akisi jür'et lagérda 9 ay qamalghandin kéyin burnidin qan aqidighan bolup qalghachqa qoyup bérilgen bolsimu, qoyup bérilgendin kéyin anisi awaxa qurmanqizi bilen bille öz öyide nezerbend astigha élin'ghan.

Gul'ayshaning muxbirigha éytip bérishiche, uning bu yil 57 yashqa kirgen yene bir akisi dilshat yétishken terjiman bolup, az dégende 15 kitab terjime qilip neshr qildurghan, köp qétim mukapatlargha érishken kompartiye ezasi iken.

Xewerge qarighanda, dilshat kéyinki yillarda qazaqistan'gha chiqip yerleshken bolsimu, qazaq puqraliqigha téxi ötmigen. U, 2016-yili tughqan yoqlash üchün xitaygha qaytqanda qolidiki qazaqistan kimlik kartisi tartiwélin'ghan we shu yerge qapsilip qalghan. Xewerde uning qachan lagérgha élip kétilgenliki éytilmighan.

Yéqinqi melumatlargha qarighanda, xitay hökümiti Uyghurlarni asas qilghan türkiy milletlerdin eng az dégen 1 milyon 800 ming kishini yighiwélish lagérlirigha tashlighan. Bu jeryanda nurghunlighan a'ililer bir biridin ayriwétilgen bolsa, chet'ellerde yashawatqan Uyghur we qazaqlar yurtida qalghan qérindashliridin xewer alalmay izchil iztirap chékishke muptila qilin'ghan idi.

Toluq bet