Бир қазақ аилисидин 5 кишиниң җазаға учриғанлиқи мәлум

Мухбиримиз җүмә
2020-01-23
Елхәт
Пикир
Share
Принт

Бир сәнәт хумар қазақ аилисиниң хитайниң лагер сиясити сәвәбидин парчиланғанлиқи, бир аилидин аз дегәндә 3 кишиниң тутқунда, икки кишиниң нәзәрбәнтә икәнлики мәлум.

«Дуняви садалар» намлиқ тор бетиниң хәвәр қилишичә, нөвәттә қазақистанда яшаватқан гулайша оралбай хитайда қалған қериндашлириниң һеч из-дерикини алалмиған.

Хәвәрдә көрситишичә, униң күйтун шәһиридә яшайдиған чоң акиси дилшатниң 7 дин 15 йиллиққичә кесилгәнликигә аит учур бар икән. Униң бақила вә бақтигук исимлик икки сиңлиси 2018-йилиниң май айлирида лагерға елип кетилгән.

Униңдин башқа униң акиси җүрәт лагерда 9 ай қамалғандин кейин бурнидин қан ақидиған болуп қалғачқа қоюп берилгән болсиму, қоюп берилгәндин кейин аниси аваха қурманқизи билән биллә өз өйидә нәзәрбәнд астиға елинған.

Гулайшаниң мухбириға ейтип беришичә, униң бу йил 57 яшқа киргән йәнә бир акиси дилшат йетишкән тәрҗиман болуп, аз дегәндә 15 китаб тәрҗимә қилип нәшр қилдурған, көп қетим мукапатларға еришкән компартийә әзаси икән.

Хәвәргә қариғанда, дилшат кейинки йилларда қазақистанға чиқип йәрләшкән болсиму, қазақ пуқралиқиға техи өтмигән. У, 2016-йили туғқан йоқлаш үчүн хитайға қайтқанда қолидики қазақистан кимлик картиси тартивелинған вә шу йәргә қапсилип қалған. Хәвәрдә униң қачан лагерға елип кетилгәнлики ейтилмиған.

Йеқинқи мәлуматларға қариғанда, хитай һөкүмити уйғурларни асас қилған түркий милләтләрдин әң аз дегән 1 милйон 800 миң кишини йиғивелиш лагерлириға ташлиған. Бу җәрянда нурғунлиған аилиләр бир биридин айриветилгән болса, чәтәлләрдә яшаватқан уйғур вә қазақлар юртида қалған қериндашлиридин хәвәр алалмай изчил изтирап чекишкә муптила қилинған иди.

Пикирләр (0)
Share
Толуқ бәт