Xitay da'irliri ürümchide xelq qurultiyining asasi qatlam mes'ullirigha terbiyelesh kursi achqan

Muxbirimiz erkin
2018-12-07
Élxet
Pikir
Share
Print

Xitay da'irliri Uyghur aptonom rayonida yéqindin béri asasi qatlam hökümet xadimlirigha we xelq qurultiyi mes'ullirigha arqa-arqidin terbiyelesh kurslirini échip, buningdin kéyinki asasi qatlam xizmitini qandaq ishlesh toghrisida orunlashturush élip barmaqta. "Shinjang géziti" ning xewer qilishiche, Uyghur aptonom rayonluq xelq qurultiyi 6‏-noyabir küni ürümchide yéza, bazarliq xelq qurultiyi mes'ullirini we yerlik ish bashqarmiliridiki xelq qurultiyi xizmet komitétining mudirlirini terbiyelesh kursigha orunlashturup, nöwettiki yéngi weziyette béyjing hökümitining "Shinjangni bashqurush bash nishani", aptonom rayonluq partkomning bu nishanni emelge ashurushtiki orunlashturushini qandaq ijra qilish toghrisida yolyoruq bergen.

Buning aldida da'iriler Uyghur aptonom rayonidiki altay, chöchek börtala, sanji qatarliq wilayet, oblast we sheherning kent, ijtima'iy rayonliridiki asasi qatlam kadirlirigha ghulja nahiyeside terbiyelesh kursi achqan. 6‏-Noyabir ötküzülgen yighinda Uyghur aptonom rayonluq xelq qurultiyining mudiri shawket imin söz qilip, asasiy qatlam xelq qurultiyi mes'ullirining "Yéngi weziyettiki xelq qurultiyi xizmitining asasliq wezipisini yaxshi ishlesh, yéngi dewrdiki yéngi wezipe, yéngi teleplerge yüzlinishi kérekliki" ni tekitligen. 

Bu kurs xelq'ara jem'iyetning diqqiti Uyghur rayonidiki yighiwélish lagérlirigha merkezliship, xelq'ara jem'iyet bu lagérlarni tekshürüshni qattiq telep qiliwatqan bir waqitta échilghan. 

"Shinjang géziti" ning xewiride, shawket imin yighinda tilgha alghan yéngi dewrdiki yéngi wezipe we yéngi teleplerning néme ikenliki chüshendürülmigen. Emma yerlik ahalilerning muxbirimizgha bildürushiche, nöwette da'iriler rayonda yerlik organlarni we asasi qatlam xadimlirini seperwer qilip, teshwiqat taxtilirini özgertish we puqralargha xelq'ara tekshürgüchiler kélip qalsa néme, dep jawab bérish heqqide "Terbiye élip barmaqta" iken.

Toluq bet