Uyghur aptonom rayonluq partkom atalmish "Shinjangliq" oqughuchilar bilen söhbet yighini achqan

Muxbirimiz eziz
2018-11-27
Élxet
Pikir
Share
Print

Uyghurlar diyaridiki siyasiy heriketlerning hazir rayon da'irisidin halqip, bashqa jaylardiki Uyghurlarghimu biwasite öz tesirini körsitiwatqanliqi Uyghur aptonom rayonluq hökümetning ötken hepte "Shinjangliq oqughuchilar söhbet yighini" achqanliqida téximu roshen eks etti.

"Shinjang géziti" ning 26-noyabirdiki xewiride éytilishiche, Uyghur aptonom rayonluq partkomning mu'awin sékrétari, ma'arip xizmet komitétining mudiri li péngshinning riyasetchilikide échilghan bu yighinda xitayning ichkiri ölkiliride oquwatqan atalmish "Shinjangliq aliy mektep oqughuchiliri, ichkiri toluq ottura mektep oqughuchiliri we munasiwetlik oqutquchilar" teklip boyiche yighin'gha qatnashqan. Yighinda oqughuchilarning oqush yaki turmush mesilisi emes, belki xitay re'isi shi jinpingning "Junggoche alahidilikke ige sotsiyalizm idiyisi we 19-qurultay rohini yétekchi qilish" heqqidiki yolyoruqlirini öginish qayta tekitlen'gen. Shundaqla bu oqughuchilarni "Üch xil küchlerge qet'iy qarshi turghuchilar" ning awan'gartliridin bolushqa chaqirghan. Yighindin kéyin bu oqughuchilar qeshqer we xoten qatarliq jaylardiki "Kespiy terbiyilesh mektipi" ni ékskursiye qilghan.

Yighindin kéyin béyjing, shangxey qatarliq jaylardin kelgen oqughuchilar wekilidin sekkiz kishi söz qilip, Uyghur aptonom rayonluq hökümet we partkomning chaqiriqigha qet'iy egishidighanliqini, "Üch xil küchlerge qarshi qet'iy küresh qilidighanliqini" bildürgen. Li péngshinmu oqughuchilargha qilghan sözide: "Ijtima'iy muqimliq, térrorluqqa qarshi turush, ikki yüzlimilikke qet'iy zerbe bérish, partiyining sözini anglap partiyige egiship méngish" qatarliqlarni oqughuchilarning mehkem este saqlishini tekitligen. Shuningdek oqughuchilarni bu qétimqi ékskursiye we öginishlerde hés qilghanlirigha birleshtürgen halda "Kespiy terbiyilesh mekteplirining ghayet zor muweppeqiyetlirini pa'al teshwiq qilishqa hesse qoshush" qa chaqirghan.

Dunya Uyghur qurultiyining bayanatchisi dilshat rishit bu heqte pikir qilip: "Bu, xitay hökümitining ichkiridiki Uyghur oqughuchilarni özlirining teshwiqat qorali qilmaqchi bolghanliqidin bashqa nerse emes. Démek ular dawamliq öz göshini öz yéghida qorushni ijra qilmaqchi" dédi.

Toluq bet