Уйғур аптоном районлуқ партком аталмиш «шинҗаңлиқ» оқуғучилар билән сөһбәт йиғини ачқан

Мухбиримиз әзиз
2018-11-27
Елхәт
Пикир
Share
Принт

Уйғурлар дияридики сиясий һәрикәтләрниң һазир район даирисидин һалқип, башқа җайлардики уйғурларғиму биваситә өз тәсирини көрситиватқанлиқи уйғур аптоном районлуқ һөкүмәтниң өткән һәптә «шинҗаңлиқ оқуғучилар сөһбәт йиғини» ачқанлиқида техиму рошән әкс әтти.

«Шинҗаң гезити» ниң 26-ноябирдики хәвиридә ейтилишичә, уйғур аптоном районлуқ парткомниң муавин секретари, маарип хизмәт комитетиниң мудири ли пеңшинниң риясәтчиликидә ечилған бу йиғинда хитайниң ичкири өлкилиридә оқуватқан аталмиш «шинҗаңлиқ алий мәктәп оқуғучилири, ичкири толуқ оттура мәктәп оқуғучилири вә мунасивәтлик оқутқучилар» тәклип бойичә йиғинға қатнашқан. Йиғинда оқуғучиларниң оқуш яки турмуш мәсилиси әмәс, бәлки хитай рәиси ши җинпиңниң «җуңгочә алаһидиликкә игә сотсиялизм идийиси вә 19-қурултай роһини йетәкчи қилиш» һәққидики йолйоруқлирини өгиниш қайта тәкитләнгән. Шундақла бу оқуғучиларни «үч хил күчләргә қәтий қарши турғучилар» ниң авангартлиридин болушқа чақирған. Йиғиндин кейин бу оқуғучилар қәшқәр вә хотән қатарлиқ җайлардики «кәспий тәрбийиләш мәктипи» ни екскурсийә қилған.

Йиғиндин кейин бейҗиң, шаңхәй қатарлиқ җайлардин кәлгән оқуғучилар вәкилидин сәккиз киши сөз қилип, уйғур аптоном районлуқ һөкүмәт вә парткомниң чақириқиға қәтий әгишидиғанлиқини, «үч хил күчләргә қарши қәтий күрәш қилидиғанлиқини» билдүргән. Ли пеңшинму оқуғучиларға қилған сөзидә: «иҗтимаий муқимлиқ, террорлуққа қарши туруш, икки йүзлимиликкә қәтий зәрбә бериш, партийиниң сөзини аңлап партийигә әгишип меңиш» қатарлиқларни оқуғучиларниң мәһкәм әстә сақлишини тәкитлигән. Шуниңдәк оқуғучиларни бу қетимқи екскурсийә вә өгинишләрдә һес қилғанлириға бирләштүргән һалда «кәспий тәрбийиләш мәктәплириниң ғайәт зор мувәппәқийәтлирини паал тәшвиқ қилишқа һәссә қошуш» қа чақирған.

Дуня уйғур қурултийиниң баянатчиси дилшат ришит бу һәқтә пикир қилип: «бу, хитай һөкүмитиниң ичкиридики уйғур оқуғучиларни өзлириниң тәшвиқат қорали қилмақчи болғанлиқидин башқа нәрсә әмәс. Демәк улар давамлиқ өз гөшини өз йеғида қорушни иҗра қилмақчи» деди.

Пикирләр (0)
Share
Толуқ бәт