Xitay Uyghur diyaridiki déhqan-charwichilargha "Yardem puli" tarqatmaqtiken

Muxbirimiz sada
2019-08-28
Élxet
Pikir
Share
Print

Uyghur aptonom rayonluq charwichiliq nazariti yéqinda "Déhqan-charwichilargha yardem puli tarqitish we mukapatlash siyasitini yolgha qoyush layihisi" ni élan qilip, mezkur layihe boyiche rayondiki déhqanlargha "Yardem puli" tarqatqan.

"Shinjang géziti" ning 28-awghusttiki alaqidar xewiride déyilishiche, mezkur layihe boyiche tarqitilghan yardem puli bérilgen térilghu yerning omumiy kölimi 691 milyon mo, tarqitilghan omumiy yardem puli mukapat sommisi 2 milyard 477 milyon 250 ming yüen bolghan. 

Xewerdin melum bolushiche, da'iriler Uyghur aptonom rayonidiki yaylaqlarda charwichilarning charwichiliq bilen shughullinishi cheklen'gen rayonlarni tesis qilghan bolup, bu jem'iy 150 milyon 100 ming mo yer iken. Buning ichidiki 5 milyon 100 ming mo yer "Su bayliqini saqlash we tebi'iy qoghdash" boyiche charwichiliq qilish cheklen'gen bolup, charwichilargha her mo yer üchün 50 yüen toluqlima bergen. 

Ötken mezgilde xitay hökümiti Uyghur diyarida atalmish "Namratliqtin qutuldurush" namida déhqan-charwichilarni zamaniwi öylerge köchürgenliki heqqide köpligen xewerler élan qilin'ghan idi. Emdilikte Uyghur diyaridiki déhqan-charwichilarning térilghu yer hem yaylaqlirigha "Cheklen'gen rayon" dep nam bérishi diqqet qozghidi.

Uyghur diyarining weziyitini yéqindin közitip kéliwatqan bezi analizchilarning qarishiche, bu xitay hökümitining déhqan-charwichilarning yer we yaylaqlirini musadire qilip, ularni özliri belgilep bergen yerde olturaqlashturush arqiliq ularni özining turmush usulidin ayrish shundaqla éritip tügitish urunushining ipadisi iken.

Toluq bet