Хитай уйғур дияридики деһқан-чарвичиларға «ярдәм пули» тарқатмақтикән

Мухбиримиз сада
2019-08-28
Елхәт
Пикир
Share
Принт

Уйғур аптоном районлуқ чарвичилиқ назарити йеқинда «деһқан-чарвичиларға ярдәм пули тарқитиш вә мукапатлаш сияситини йолға қоюш лайиһиси» ни елан қилип, мәзкур лайиһә бойичә райондики деһқанларға «ярдәм пули» тарқатқан.

«Шинҗаң гезити» ниң 28-авғусттики алақидар хәвиридә дейилишичә, мәзкур лайиһә бойичә тарқитилған ярдәм пули берилгән терилғу йәрниң омумий көлими 691 милйон мо, тарқитилған омумий ярдәм пули мукапат соммиси 2 милярд 477 милйон 250 миң йүән болған. 

Хәвәрдин мәлум болушичә, даириләр уйғур аптоном районидики яйлақларда чарвичиларниң чарвичилиқ билән шуғуллиниши чәкләнгән районларни тәсис қилған болуп, бу җәмий 150 милйон 100 миң мо йәр икән. Буниң ичидики 5 милйон 100 миң мо йәр «су байлиқини сақлаш вә тәбиий қоғдаш» бойичә чарвичилиқ қилиш чәкләнгән болуп, чарвичиларға һәр мо йәр үчүн 50 йүән толуқлима бәргән. 

Өткән мәзгилдә хитай һөкүмити уйғур диярида аталмиш «намратлиқтин қутулдуруш» намида деһқан-чарвичиларни заманиви өйләргә көчүргәнлики һәққидә көплигән хәвәрләр елан қилинған иди. Әмдиликтә уйғур дияридики деһқан-чарвичиларниң терилғу йәр һәм яйлақлириға «чәкләнгән район» дәп нам бериши диққәт қозғиди.

Уйғур дияриниң вәзийитини йеқиндин көзитип келиватқан бәзи анализчиларниң қаришичә, бу хитай һөкүмитиниң деһқан-чарвичиларниң йәр вә яйлақлирини мусадирә қилип, уларни өзлири бәлгиләп бәргән йәрдә олтурақлаштуруш арқилиқ уларни өзиниң турмуш усулидин айриш шундақла еритип түгитиш урунушиниң ипадиси икән.

Пикирләр (0)
Share
Толуқ бәт