Хитай даирилири уйғур диярида йәнә 200 миң аилини юрт-маканлиридин көчүрүшни пиланлимақтикән

Мухбиримиз ирадә
2019-05-16
Елхәт
Пикир
Share
Принт

«Шинҗаң гезити» ниң хәвиригә қариғанда, хитай даирилири бу йил уйғур елидики йезиларда «әмин өй қурулуши» пилани бойичә йәнә 200 миң аилини көчүрүшни пиланлимақтикән.

Хәвәрдә баян қилинишичә, хитай мәркизи һөкүмитиниң малийә ярдими билән елип бериливатқан бу қурулушта уйғур дияридики йеза аһалисини йүз көлими 40-60 квадрат метирдин ашмайдиған кичик өйләргә көчүрүп, «омумйүзлүк қаплаш, азрақму бошлуқ қоймаслиқ» ишқа ашурулидикән. 

Хитай даирилири «әмин өй қурулуши» ни «намратларни көчүрүш арқилиқ йөләш» қурулуши дәп тәшвиқ қилип кәлгән иди. Бирақ чәтәлләрдики уйғур көзәткүчиләр буни уйғурларни йәр-земинлиридин айришни мәқсәт қилған қурулуш, дәп қаримақта. 

Улар хитай һөкүмитиниң илгириму «йәр тәврәшкә чидамлиқ өй қурулуши» арқилиқ уйғурларни әвладму-әвлад яшап кәлгән өй-җай вә земинлиридин айривәткәнликини билдүрди.

Дәрвәқә, радийомиз илгири игилигән учурларда қумулниң мәнзирилик тағлиқ районлиридики йеза аһалисиниң юқириқи сиясәтләргә асасән бир туташ һалда шәһәр әтрапидики һөкүмәт салған тар-тапчуқ, төвән иҗарилик туралғуларға көчүрүлгәнлики, йеридин айрилған бу кишиләрниң намратлиқтин қутулуш әмәс, әксичә техиму намратлишип, һөкүмәт бәргән қутқузуш пулиға қарап қалғанлиқи мәлум болған. 

Көзәткүчиләрниң көрситишичә, хитайниң бу «әмин өй қурулуши» лагер сиртидики уйғур йеза аһалилирини бир йәргә йиғип, уларниму охшашла контрол астиға елишни мәқсәт қилидикән.

Пикирләр (0)
Share
Толуқ бәт