Уйғур елидә ечиливатқан икки қурултайда «муқимлиқ вә мәңгүлүк әминлик» тәдбирлирини давамлаштуруш тәкитләнгән

Мухбиримиз ирадә
2020-01-08
Елхәт
Пикир
Share
Принт

Уйғур аптоном районида нөвәттә «аптоном районлуқ 13-нөвәтлик хәлқ қурултийи 3-йиғини» вә «сиясий кеңәш 12-нөвәтлик комитети 3-йиғини 2-омумий йиғини» дин ибарәт икки омумий йиғин ечиливатқан болуп, бу йиғинларда бирдәк «иҗтимаий муқимлиқ вә әбәдий әминлик баш нишанини давамлиқ изчиллаштуруш» тәкитләнгән.

Тәңритағ ториниң «икки йиғин» һәққидә 8-январ күни тарқатқан хәвәрлиридә көрситилишичә, икки йиғинда сөз қилған партком секритари чен чүәнго вә уйғур аптоном район рәиси шөһрәт закир, сиясий кеңәш рәиси нурлан әбилмәҗин қатарлиқлар бирдәк районниң нөвәттики «муқим вә тинч» вәзийитигә капаләтлик қилишни тәкитләп, нөвәттә иҗра қилиниватқан муқимлиқ сиясәтлириниң қәтий давамлаштурулидиғанлиқини билдүргән. 

Диққәт қозғайдиғини, йиғинға һәрқайси җайлардин кәлгән вәкилләр гуруппа йиғинлирида бирдәк американиң уйғур кишилик һоқуқ қанун лайиһәсини әйибләшкә селинған болуп, тәңритағ ториниң икки йиғин һәққидики хәвәр сәһипилири һәр саһә, һәр җайлардин кәлгән хәлқ вәкиллириниң америкаға қаратқан тәнқидлири билән тошуп кәткән. 

Уларниң илгири сүрүшичә, «вәкилләр американиң ‹шинҗаңниң ишлириға арилашқанлиқини' бәс-бәстә тәнқид қилған вә шинҗаңниң һазирқи вәзийитиниң тарихта көрүлүп бақмиған дәриҗидә яхшилиқи, хәлқниң бәхт туйғусиниң йүксәк пәллигә чиққанлиқи, райондики һәр милләт хәлқиниң һазирқи күнлириниң‹һәсәлдинму татлиқ' икәнликини» билдүрүшкән. 

Чәтәлләрдики мустәқил кишилик һоқуқ органлири пакитлар арқилиқ районда һазир икки милйон әтрапида уйғур қатарлиқ милләтләрниң йиғивелиш лагерлирида зулум көрүватқанлиқини, лагер сиртидики уйғурларниңму орвелчә сақчи дөлити системиси астида қамал қилиниватқанлиқи, уларниң тили, дини, пән-маарип ишлириниң еғир бузғунчилиққа учраватқанлиқини, хитай һөкүмитиниң пиланлиқ вә системилиқ һалда «мәдәнийәт қирғинчилиқи» йүргүзүватқанлиқини билдүрмәктә.

Пикирләр (0)
Share
Толуқ бәт