Xitay da'iriliri baghrash kölige hedep sayahetchi chaqirmaqta

Muxbirimiz irade
2019-05-02
Élxet
Pikir
Share
Print

Xitay hökümiti Uyghur élida 800 mingdin 2 milyon'ghiche Uyghur, qazaq qatarliq yerlik milletlerni yépiq terbiye lagérlirigha qamap, yene bir yaqtin yuqiri pen-téxnika arqiliq rayonni "Üsti ochuq türme" ge aylandurghanliqi xelq'arada küchlük tenqidke uchrawatqan bir shara'itta xitay da'iriliri sirtqa qaratqan teshwiqatlirida Uyghur élidiki sayahetchilik xizmetlirini hedep bazargha salmaqta.

Shinxu'a torining 2-may küni tarqatqan bir xewiride, 1-may emgekchiler bayrimi munasiwiti bilen xitaydiki "5 A" derijilik menzire rayoni hésablinidighan baghrash kölidiki sayahetchilik ishlirining janlinip, sayahetchilerning toshup ketkenliki xewer qilin'ghan. Xewerde bérilgen sürette köl etrapining pütünley xitayche pasonda sélin'ghan chong-kichik rawaqlar bilen tolduruwétilgenliki diqqet qozghidi. 

Baghrash köli Uyghur éli we shundaqla xitay miqyasi boyichimu chong tiptiki ichki quruqluq tatliq su köli bolup, kölimi 1200 kwadrat kilométir etrapida kélidu. Baghrash köli we uning etrapidiki sazliqlar bolsa adette kem uchraydighan aqqu, ghaz, ördek we her türlük yerlik béliqlarning makani.

Biraq, xitay da'iriliri mezkur kölni sayahetchilerge échiwetken nechche on yildin buyan kölning muhiti éghir derijide buzghunchiliqqa uchrap, kem uchraydighan qush we béliqlarning türi zor derijide aziyip ketken, hetta beziliri yoqilish girdabigha bérip qalghan idi.

Shinxu'a agéntliqi 2017-yili baghrash kölining muhitini jiddiy eslige keltürüsh xizmitining bashlan'ghanliqi heqqidiki bir xewiride bu heqtiki bir qisim tepsilatlarni ashkarilighan. Xewerdin melum bolushiche, yéqinqi 20 yildin buyan köl etrapida qurulghan zawut karxanilardin chiqqan meynet su we exletler baghrash kölining etrapidiki 600 ming mo qomushluqning 1/3 qismining qurup kétishige we baghrash kölining süyining jiddiy derijide kirlishishi, tuzlishishi we aziyishigha seweb bolghan iken. 

Da'iriler gerche bir qisim tedbirlerni élip, köl etrapidiki muhitni qismen eslige keltürgen bolsimu, biraq bu yerdiki heddidin ziyade sayahetchilik xizmetlirining köl muhitigha ep kélidighan ziyini közetküchilerning endishisini qozghimaqta.

Toluq bet