Baydiki bir Uyghur bashlan'ghuch mektipide birmu Uyghur oqutquchi qalmighan

Muxbirimiz erkin
2018-08-17
Élxet
Pikir
Share
Print

Aqsu wilayitining bay nahiyesidiki bir Uyghur bashlan'ghuch mektipidiki Uyghur oqutquchilarning hemmisi xitay oqutquchilargha almashturulup, mektepte birmu Uyghur oqutquchi qalmighan.

"Shyangyang bashlan'ghuch mektipi" 1968‏-yili qurulghan bolup, burun bu mektepning oqutquchi-oqughuchilirining hemmisi dégüdek Uyghur idi. Pütün künlük, yataqliq we 6 yilliq mejburiy ma'arip tüzümidiki bu mektepte hazirmu Uyghur oqughuchilar 90 pirsentni igileydiken.

Aqsu axbarat torining yéqinda ashkarilishiche, hazirmu Uyghur oqughuchilarni asas qilghan bu mekteptiki "Oqutquchilarning hemmisi xenzulargha almashturulup, dölet ortaq til-yéziqi oqutquchisini seplesh nisbiti 100 pirsentke yetküzülgen." bu mektepning burunqi Uyghur oqutquchilirining qandaq bir terep qilin'ghanliqi melum emes.

Yéqinda b d t irqiy ayrimichiliqqa qarshi turush komitétining jenwede ötküzülgen yighinida xitay wekiller ömiki Uyghur rayonidiki mekteplerde Uyghur tilining siqip chiqirilghanliqini inkar qilghan idi. Irqiy ayrimichiliqqa qarshi turush komitétining yighinida bir xitay wekili xoten wilayetlik ma'arip idarisining ötken yili 7‏-ayda mekteplerning oqutush we memuriy ishlirida Uyghur tili ishlitishni cheklesh toghrisida höjjet chiqarghanliqini inkar qilip, bu uchurni "Yalghan" dégen idi. Halbuki, xoten wilayetlik ma'arip idarisining emeldarliri ötken yili radi'omizning ziyaritini qobul qilghanda bu höjjetni étirap qilghan we buninggha xilapliq qilghanlarning "Ikki yüzlimichilik" bilen jazalinidighanliqini bildürgen idi.

Chet'eldiki Uyghur pa'aliyetchilirining qarishiche, "Shyangyang bashlan'ghuch mektipining ehwali xitay medeniyet qirghinchiliqining qanchilik shiddet bilen kéngiyiwatqanliqi" ni körsitidiken. Lékin aqsu axbarat torining xewiride qeyt qilinishiche, mektep mudiri fang changyü mekteptiki bu özgirishni aqlap, "Oqutquchilar qoshunimizni toluqliduq. Biz mektep medeniyiti, klassik medeniyet muhiti berpa qilish arqiliq jongxu'aning ésil en'eniwi medeniyitige warisliq qilishni gewdilandürduq," dégen.

Toluq bet