Ghulja nahiyesi 600 neper xitay tilliq oqutquchi qobul qilidiken

Muxbirimiz irade
2019-02-05
Élxet
Pikir
Share
Print

Ghulja nahiyesi nahiye tewesidiki bashlan'ghuch we ottura mekteplerge 600 neper "Dölet tili" da yeni, xitay tilida ders béridighan oqutquchi qobul qilidighanliqi heqqide élan chiqarghan.

Ghulja nahiyelik hökümetning tor bétide tarqitilghan uqturushta yuqiridiki oqutquchilarning "Jem'iyet muqimliqi we uzun muddetlik eminlikni ishqa ashurup bash nishanni emeliyleshtürüsh, mekteplerde dölet tili oqutushini omumlashturush" meqsitide Uyghur éli we xitay ölkiliridin qobul qilinidighanliqi bayan qilin'ghan.

Qobul qilinidighan xitay tili oqutquchiliri toluqsiz ottura we bashlan'ghuch mekteplerge 470 neper, toluq ottura mekteplerge 130 neper bolup, jem'iy 600 neper iken.

Buningdin sirt ghulja nahiyesi yene kespiy toluq ottura mekteplerge jem'iyettin 20 neper oqutquchi qobul qilidighanliqi heqqide ayrim uqturush chiqarghan. Yuqiridiki bu élanlarning hemmiside iltimas qilghuchilarning "Wetenning birlikini söyidighan, milliy bölgünchilikke we qanunsiz diniy pa'aliyetke qarshi turidighan" bolushi shert qilin'ghan. Shuningdek iltimas qilghuchilardin élinidighan éghizche we yazma imtihanlarning "Dölet tili" da bolidighanliqi eskertilgen.

Bu yil yil örülgendin buyan Uyghur élining herqaysi wilayet-nahiyeliride saqchi yaki bixeterlik xadimi we oqutquchi qobul qilish heqqide uqturushlar köplep élan qilinishi diqqet qozghidi. Chet'ellerdiki Uyghur közetküchiler xitay hökümitining Uyghur élige yene köplep xitay köchmen yötkep, lagérlargha qamalghan Uyghurlarning ornini toldurmaqchi boluwatqanliqini perez qilishmaqta.

Toluq bet