Xitay da'iriliri Uyghur rayonining omumiy ishlepchiqirishi 9.3 Pirsent éship méngiwatqanliqini bildürgen

Muxbirimiz erkin
2017-10-11
Élxet
Pikir
Share
Print

Uyghur aptonom rayoni da'iriliri mezkur rayonning omumiy ishlepchiqirish omumi qimmitining yéqinqi 5 yildin béri izchil 9.3 Pirsent éship méngiwatqanliqini bildürgen. Xitay "Yer shari waqti géziti" ning xewer qilishiche, bezi mutexessisler Uyghur rayonida iqtisadi tereqqiyat bilen muqimliq otturisidiki tengpungluqni saqlashning halqiliq amil ikenlikini bildürgen.

Uyghur aptonom rayonluq tereqqiyat we islahat komitéti yéqinda élan qilghan bayanatida, Uyghur rayonining omumiy ishlepchiqirish sommisi 2012‏-yili 750 milyard 500 milyon yüen bolghan bolsa, uning 2016‏-yili 961 milyard 7 milyon yüen'ge yétip, yiligha 9.3 Pirsent éship mangghanliqini bildürgen. Xitay axbaratining bildürüshiche, bu xitayning memliketlik otturiche yilliq iqtisadi ösüsh sewiyesidin 2.2 Pirsent éship ketken.

Biraq, xelq'aradiki bezi iqtisadshunaslarning ilgiri sürüshiche, Uyghur rayoni iqtisadining ösüshi normal meblegh we ishlepchiqirish yoli bilen bolmighan. Iqtisadshunaslar, iqtisadning uda 5 yil 9.3 Pirsent éship méngishida xitay merkizi hökümitining bu rayon'gha séliwatqan siyasiy meblighi we muqimliq sélinmisi halqiliq rol oynawatqanliqini bildürdi. Xitay hökümiti yéqinqi yillardin béri Uyghur rayonining amanliq qurulushi, qosh tilliq ma'arip, tor bixeterlik, yéngi olturaq rayonlar qurulushi we bashqa hul qurulushlirigha zor miqdarda meblegh sélip kelgen.

"Yer shari waqti géziti" ning xewiride, xitay da'irilirining yéqinqi 5 yilda Uyghur rayonigha 59 milyard 800 milyon yüen meblegh sélip, 5587 xil qurulush türini emeliyleshtürgenlikini bildürgen. Lékin, Uyghur kishilik hoquq teshkilatlirining bildürüshiche, bu qurulush türliri nishanliq xitay köchmenlirige menpe'et yetküzüp, Uyghurlar menpe'etdar bolalmighan.

Toluq bet