Асасий қатламларда уйғур кадирлар давамлиқ зәрбә нишани болмақтикән

Мухбиримиз ирадә
2019-08-15
Елхәт
Пикир
Share
Принт

Тоқсун наһийилик тутуп туруш орниниң сиясий йетәкчиси абдулим абләқ оғлиниң той мурасимиға көп адәм чақирғанлиқи үчүн җазаланған.

Турпан вилайәтлик һөкүмәт ториниң 13-авғуст күнидики хәвиридә баян қилинишичә, абдулим абләқ 2018-йили 10-айниң 3 вә 4-күнлири оғлиниң тойини қилип, икки күндә җәмий 510 адәмни тойға тәклип қилғанлиқи, той мәрикисигә қатнашқанлар ичидә 49 нәпәр сақчи хадими барлиқи вә тойда җәмий 9000 йүән пул чүшкәнлики үчүн «интизамға хилаплиқ қилиш» билән әйиблинип, омумий уқтуруш чиқирилған. 

Абдулим абләқниң оғлиниң тойи болуп, аз кәм бир йил болай дегәндә җазалиниши диққәт қозғиди. Чәтәлләрдики уйғур көзәткүчиләр хитай һөкүмитиниң асасий қатламларда «икки йүзлимичиләрни тохтимай қидирип чиқириш» дәйдиған чақириқлар билән уйғур кадирларға давамлиқ зәрбә бериватқанлиқини билдүрди. Уларниң қаришичә, абдулим абләқниң оғлиниң той мәрикисини уйғурларниң өрп-адәтлири бойичә өткүзүшиниң җинайәт қатарида бир тәрәп қилинишиму алаһидә диққәт қозғайдикән. 

Юқириқи бу хәвәрдин мәлум болушичә, бу қетим турпан вилайити тәвәсидә қурбан һейт мәзгилидә аталмиш «интизамни йәнә бир қетим тәртипкә селип, һошярлиқни өстүрүш» мәқсити билән абдулим абләқ қатарлиқ 5 нәпәр һөкүмәт кадири җазаланған болуп, уларниң үч нәпири уйғур икән.

Пикирләр (0)
Share
Толуқ бәт