ئامېرىكا ئۇيغۇرچە قاتارلىق تىللارنى تەرجىمە قىلىش ماشىنىسى ياساشقا 14 مىليون دوللار ئاجراتقان

مۇخبىرىمىز ئەركىن
2017-11-15
ئېلخەت
پىكىر
Share
پرىنت

ئامېرىكانىڭ مەملىكەتلىك ئىستىخبارات مۇدىرىيىتىگە قاراشلىق بىر تەتقىقات ئورنى ئۇيغۇرچە قاتارلىق يەرلىك تىللارنى ئاپتوماتىك تەرجىمە قىلىش ماشىنىسى ياساپ چىقىشقا 14 مىليون دوللار پۇل ئاجرىتىپ، بۇ قۇرۇلۇشنى كولومبىيە ئۇنىۋېرسىتېتىنىڭ بىر تەتقىقات گۇرۇپپىسىغا ھۆددىگە بەرگەن.

كولومبىيە ئۇنىۋېرسىتېتىنىڭ ئاشكارىلىشىچە، «تىل ئۇچۇرلىرىنى بىر تەرەپ قىلىش، تەرجىمە قىلىش، خۇلاسىلەش سىستېمىسى» دەپ ئاتالغان مەزكۇر تەرجىمە ماشىنىسى ئۇيغۇرچە قاتارلىق يەرلىك تىللاردىكى «ئۇچۇرلارنى يىغىش، تەرجىمە قىلىش ۋە خۇلاسىلەش » ئىشلىرىنى قىلىدىكەن. 14 مىليون دوللارلىق بۇ تەتقىقات تۈرى ئامېرىكا مەملىكەتلىك ئىستىخبارات مۇدىرىيىتىنىڭ «يۇقىرى تېخنىكىلىق ئىستىخبارات تەتقىقات قۇرۇلۇشى» تەرىپىدىن ئامېرىكا كولومبىيە ئۇنىۋېرسىتېتى سانلىق مەلۇمات پەنلىرى ئىنستىتۇتنىڭ دىرېكتورى كەتلېن مىككېئون باشچىلىقىدىكى تەتقىقات گۇرۇپپىسىغا ھۆددىگە بېرىلگەن.

خەۋەردە قەيت قىلىشىچە، يەرلىك تىللاردىكى ئۇچۇرلارنى يىغىش، تەرجىمە قىلىش، خۇلاسىلەش ماشىنىسى» ئاخبارات ۋاسىتىلىرىدە ئېلان قىلىنغان ئۇيغۇر، ئوتتۇرا ئافرىقىنىڭ خۇئاسا قاتارلىق يەرلىك تىللىرىدىكى يازما ماتېرىياللارنى ۋە شۇنداقلا ۋىدېئو، ئاخبارات خەۋەرلىرىدىكى سۆزلەرنى ئوقۇيدىكەن، ئاندىن سانلىق مەلۇمات ئانالىزچىلىرى ئۇنىڭدىكى بوشلۇقنى تولۇقلاپ، ئالاقىدار ماتېرىياللارنى تەرجىمە قىلىش ۋە ئۇچۇر مەزمۇنىنىڭ ئىنگلىزچە خۇلاسىسىنى يېزىپ چىقىرىشنى ئىشقا ئاشۇرىدىكەن.

ئامېرىكا دائىرىلىرىنىڭ مەزكۇر تەتقىقات تۈرى خىتاي ھۆكۈمىتى ئۇيغۇر رايونىدىكى مەكتەپلەردە ئۇيغۇرچىنى چەكلەپ، خىتايچىنى «دۆلەت تىلى» نامىدا مەجبۇرى ئومۇملاشتۇرۇۋاتقان مەزگىلدە ئوتتۇرىغا قويۇلغان.

كۆزەتكۈچىلەرنىڭ ئىلگىرى سۈرۈشىچە، مەزكۇر قۇرۇلۇش تۈرى ئۇيغۇر تىلىنىڭ ئىستراتېگىيىلىك تىل، دەپ قارىلىۋاتقنالىقىنى كۆرسىتىدىكەن.

پىكىرلەر (0)
Share
تولۇق بەت