Уйғур елидики таратқуларда норуз байрими тилға елинмиди

Мухбиримиз ирадә
2019-03-21
Елхәт
Пикир
Share
Принт

Уйғурларниң әнәниви байрими болған норуз йетип кәлгән бир пәйттә уйғур елидики һечқандақ бир хәвәр қанилиниң бу байрамни тилға алмаслиқи диққәт қозғиди.

Хитай һөкүмити йеқинқи икки йилдин буян уйғурларни хитайларниң әнәниви байрамлирини тәбрикләш паалийәтлиригә омумйүзлүк сәпәрвәр қилип, чаған байрими, тавуз чағини вә панус байрими қатарлиқларниң җай-җайларда зор дағдуға билән күтүвелинғанлиқини һәдәп тәшвиқ қилип кәлмәктә.

Әйни чағда уйғурларниң өйлиригә панус вә мәснәви есип, яңгир уссули ойнап, ай тоқичи йәп байрам тәбриклигәнликини кәң тәшвиқ қилған «тәңритағ тори», «хәлқ тори», «шинҗаң хәлқ радийо истансиси» қатарлиқ хитай ахбарат васитилириниң 21-март күнидики сәһиписидә әнәниви норуз байрими тоғрисида бир парчиму хәвәр берилмигән. Йәрлик һөкүмәтләрниң тор бәтләрдиму уйғурлар арисида зор тәнтәнә билән тәбриклинидиған норуз байриминиң тәбрикләнгәнликигә даир хәвәр елан қилинмиған.

Чәтәлләрдики уйғур көзәткүчиләрниң қаришичә, бу хитай һөкүмитиниң уйғур елидә омумйүзлүк һалда мәдәнийәт қирғинчилиқи йүргүзүватқанлиқиниң рошән ипадиси икән. Улар хитай һөкүмитиниң уйғурларниң миллий вә дини хаслиқини ипадә қилидиған барлиқ миллий байрамларниң бирдәк чәкләнгән болуши мумкинликини пәрәз қилишмақта.

Хәлқара кәчүрүм тәшкилати өзиниң фейсбуктики хитай тили сәһиписидә елан қилған язмисида бүгүн гәрчә уйғурлар вә қазақлар ортақ тәбрикләйдиған әнәниви норуз байрими болсиму, бирақ уларниң нурғунлириниң йепиқ тәрбийә лагерлириға солинип, аилә бойичә азаб тартиватқанлиқини әскәртип өтти.

Хәлқара кишилик һоқуқ органлири өз доклатлирида хитай һөкүмитиниң уйғур елидики бир милйондин ошуқ уйғур, қазақ қатарлиқ йәрлик милләтләрни 2017-йилидин башлап, лагерға қамаш арқилиқ уларни өз ана тилидин, миллий вә дини кимликидин ваз кечишкә қиставатқанлиқини билдүргән.

Бу йиллиқ норуз байрими дуняниң һәрқайси җайлирида бу байрамни тәбрикләйдиған дөләтләр вә милләтләр арисида тәнтәнә билән күтүвелинди. Җүмлидин уйғурларму дуняниң һәрқайси җайлирида түрлүк паалийәтләр арқилиқ йеңи йилни күтүвалди. Америка ташқи ишлар министирлиқиниң дини ишларға мәсул алаһидә әлчиси сам бровнбәк бүгүн тивиттерда норуз байрими өткүзидиған барлиқ хәлқләрниң байримини тәбриклиди.

Пикирләр (0)
Share
Толуқ бәт