Америкадики уйғур яшлири америка кеңәш палата рәиси меч макконелға чақириқ қилди

Мухбиримиз ирадә
2019-12-11
Елхәт
Пикир
Share
Принт

Америка авам палатасида 3-декабир күни 1 гә қарши 407 аваз билән мақулланған «2019-йиллиқ уйғур кишилик һоқуқ лайиһәси» ни бу йил аяғлашмай туруп кеңәш палатасидин өткүзүш үчүн америкадики уйғур җамаити паал һәрикәткә кәлди.

11-Декабир күни америкадики бир қисим уйғур яшлири америка кеңәш палатасиниң рәиси меч макконелға хитаб қилинған бир қисқа видийо тәйярлап тарқатти. Бу уйғур яшлири видийода өзлириниң америка пуқраси икәнликини тәкитлигән. Улар видийода «хитай һөкүмити бизниң ата-ана, таға-һамма вә башқа уруқ-туғқанлиримизни лагерға қамаш, гөрүгә елиш қатарлиқ усуллар арқилиқ америка пуқралириниң һәрикитини америка земинида туруп контрол қилишқа, чәкләшкә урунуватиду,» дегән.

Улар уйғур елидики лагерларда милйонларчә кишиниң азаб чекиватқанлиқини әскәртип, америка кеңәш палата рәиси меч макконелни авам палатада тарихий характерлик юқири аваз билән мақулланған бу лайиһәни дәрһал кеңәш палатада авазға қоюп униң бу йил өрүлмәй туруп қанунға айлинишиға капаләтлик қилишиға дәвәт қилған.

Америка уйғур бирләшмиси 8‏-декабир күни йиғин чақирип, «уйғур кишилик һоқуқ қанун лайиһәси» ниң тезрәк мақуллиниши үчүн америкадики барлиқ уйғурларни омумйүзлүк сәпәрвәрликкә чақирған иди. юқириқи бу видийому америка уйғур бирләшмисиниң орунлаштуруши билән ишләнгән болуп, у нөвәттә иҗтимаий таратқуларда кәң тарқитилмақта.

Мәлум болушичә, қанун лайиһәсиниң кеңәш палатасида мушу ай ичидә авазға қоюлушини қолға кәлтүрүш үчүн америкадики һәр бир уйғурниң кеңәш палата рәһбири мич микконелға вә башқа кеңәш палата әзалириға телефон қилиши, хәт йезиши, йүз туранә көрүшүши, шуниңдәк америка җәмийитигә хизмәт ишләп, тәтқиқатчилар, аммиви тәшкилатлар, таратқулар вә қолум-қошниларни сәпәрвәрликкә кәлтүрүши зөрүр икән.

Пикирләр (0)
Share
Толуқ бәт