Chén chü'en'go muqimliq xizmiti yighini chaqirip rayonda "Qattiq zerbe bérish we yuqiri bésim halitini dawamliq saqlash" ni telep qilghan

Muxbirimiz irade
2019-09-03
Élxet
Pikir
Share
Print

Xitay hökümiti bu yil 10-ayda dölet qurulghanliqining 70 yilliqini tebrikleydighan bolup, bu seweblik Uyghur élidiki bixeterlik tedbirlirining yenimu chingilitidighanliqi melum bolmaqta.

Tengritagh torining xewiridin qarighanda, Uyghur aptonom rayonining partkom sékrétari chén chüen'go 2-séntebir küni mexsus "Muqimliqni qoghdash xizmiti téléwiziye-téléfon yighini" chaqirip, qattiq zerbe bérish halitini dawamliq saqlashni telep qilghan.

Chén chüen'go yighinda qilghan sözide, xitay döliti qurulghanliqining 70 yilliqini "Xitayning'ikki 100 yil'liq küresh nishani we jungxu'a millitining ulugh güllinishidin ibaret junggo arzusigha qarap atlan'ghan muhim tarixiy tügün" dep körsetken we Uyghur élidiki muqim weziyetni saqlashning zor ehmiyetke ige ikenlikini tekitlep, "Rayondiki muqimliqni qoghdash tedbirlirini keskin emeliyleshtürüshni, hoshyarliqni da'im saqlap, qattiq zerbe bérish yuqiri bésim halitini saqlashni" telep qilghan.

U bundin bashqa yene chet'ellerdiki kishilik hoquq pa'aliyetchilirining izchil tenqidige uchrap kéliwatqan "Milletler ittipaqliship bir a'ile kishiliridek bolush" we "Milletler ittipaqliqi birleshme dostluq pa'aliyiti" dégendek pa'aliyetlernimu alahide tilgha élip: "Bundaq pa'aliyetlerni yenimu chongqur qanat yaydurup, herqaysi milletlerning alaqilishishi, almashturushi, yughurulushini kücheytish kérek, wetenperwer diniy zatlargha ghemxorluq qilishni kücheytip, dinni sotsiyalizm jem'iyitige uyghunlashturushqa pa'al yéteklesh kérek" dégenlerni tekitligen.

Xewerdin qarighanda, mezkur yighin'gha aptonom rayonluq xelq qurultiyi, hökümet, siyasiy kéngesh, shinjang herbiy rayoni, shinjang ishlepchiqirish-qurulush bingtu'eni, Uyghur aptonom rayonluq yuqiri xelq sot mehkimisi, aptonom rayonluq xelq teptish mehkimisi, qoralliq saqchi qisimning Uyghur élidiki bash etriti qatarliq orunlarning bashliqliri qatnashqan. Chén chüen'go yene, rayondiki muqimliqni qoghdashta "Partiye, hökümet, armiye, saqchi, bingtu'en, xelq masliship birlikte heriketlinish kérek" likini bildürgen.

Dunya Uyghur qurultiyining bayanatchisi dilshat rishit yuqiridiki bu muqimliq xizmiti yighini toxtilip "Uyghur élide muqimliq bahanisi bilen 2 milyon etrapida Uyghur we bashqilar lagérgha qamalghan hem pütkül rayon alliqachan bir üsti ochuq türmige aylandurulghan bir shara'itta yene muqimliqni tedbirlirini chingitishtin söz échish kishini chöchütidu" dep körsetti.

U sözide yene "Chén chü'en'goning shinjangni idare qilishta partiye, hökümet, armiye, saqchi birlikte heriketlinish kérek, déyishining özila rayondiki derijidin tashqiri bésimdin dérek bérip turmaqta" dédi.

Toluq bet