Чен чүәнго муқимлиқ хизмити йиғини чақирип районда «қаттиқ зәрбә бериш вә юқири бесим һалитини давамлиқ сақлаш» ни тәләп қилған

Мухбиримиз ирадә
2019-09-03
Елхәт
Пикир
Share
Принт

Хитай һөкүмити бу йил 10-айда дөләт қурулғанлиқиниң 70 йиллиқини тәбрикләйдиған болуп, бу сәвәблик уйғур елидики бихәтәрлик тәдбирлириниң йәниму чиңилитидиғанлиқи мәлум болмақта.

Тәңритағ ториниң хәвиридин қариғанда, уйғур аптоном райониниң партком секретари чен чүәнго 2-сентәбир күни мәхсус «муқимлиқни қоғдаш хизмити телевизийә-телефон йиғини» чақирип, қаттиқ зәрбә бериш һалитини давамлиқ сақлашни тәләп қилған.

Чен чүәнго йиғинда қилған сөзидә, хитай дөлити қурулғанлиқиниң 70 йиллиқини «хитайниң'икки 100 йил‹лиқ күрәш нишани вә җуңхуа миллитиниң улуғ гүллинишидин ибарәт җуңго арзусиға қарап атланған муһим тарихий түгүн» дәп көрсәткән вә уйғур елидики муқим вәзийәтни сақлашниң зор әһмийәткә игә икәнликини тәкитләп, «райондики муқимлиқни қоғдаш тәдбирлирини кәскин әмәлийләштүрүшни, һошярлиқни даим сақлап, қаттиқ зәрбә бериш юқири бесим һалитини сақлашни» тәләп қилған.

У бундин башқа йәнә чәтәлләрдики кишилик һоқуқ паалийәтчилириниң изчил тәнқидигә учрап келиватқан «милләтләр иттипақлишип бир аилә кишилиридәк болуш» вә «милләтләр иттипақлиқи бирләшмә достлуқ паалийити» дегәндәк паалийәтләрниму алаһидә тилға елип: «бундақ паалийәтләрни йәниму чоңқур қанат яйдуруп, һәрқайси милләтләрниң алақилишиши, алмаштуруши, юғурулушини күчәйтиш керәк, вәтәнпәрвәр диний затларға ғәмхорлуқ қилишни күчәйтип, динни сотсиялизм җәмийитигә уйғунлаштурушқа паал йетәкләш керәк» дегәнләрни тәкитлигән.

Хәвәрдин қариғанда, мәзкур йиғинға аптоном районлуқ хәлқ қурултийи, һөкүмәт, сиясий кеңәш, шинҗаң һәрбий райони, шинҗаң ишләпчиқириш-қурулуш биңтуәни, уйғур аптоном районлуқ юқири хәлқ сот мәһкимиси, аптоном районлуқ хәлқ тәптиш мәһкимиси, қораллиқ сақчи қисимниң уйғур елидики баш әтрити қатарлиқ орунларниң башлиқлири қатнашқан. Чен чүәнго йәнә, райондики муқимлиқни қоғдашта «партийә, һөкүмәт, армийә, сақчи, биңтуән, хәлқ маслишип бирликтә һәрикәтлиниш керәк» ликини билдүргән.

Дуня уйғур қурултийиниң баянатчиси дилшат ришит юқиридики бу муқимлиқ хизмити йиғини тохтилип «уйғур елидә муқимлиқ баһаниси билән 2 милйон әтрапида уйғур вә башқилар лагерға қамалған һәм пүткүл район аллиқачан бир үсти очуқ түрмигә айландурулған бир шараитта йәнә муқимлиқни тәдбирлирини чиңитиштин сөз ечиш кишини чөчүтиду» дәп көрсәтти.

У сөзидә йәнә «чен чүәнгониң шинҗаңни идарә қилишта партийә, һөкүмәт, армийә, сақчи бирликтә һәрикәтлиниш керәк, дейишиниң өзила райондики дәриҗидин ташқири бесимдин дерәк берип турмақта» деди.

Пикирләр (0)
Share
Толуқ бәт