Уйғур аптоном районида йеқинқи икки йилда 230 миң адәм қамаққа һөкүм қилинған

Мухбиримиз әркин
2019-09-02
Елхәт
Пикир
Share
Принт

Уйғур аптоном районида 2017 вә 2018‏-йиллири қамақ җазасиға һөкүм қилинғанлар шиддәт билән көпәйгән. «Ню-йорк вақти гезити «31‏-авғуст елан қилған хәвиридә уйғур районидики әдлийә тармақлириниң 2017 вә 2018‏-йиллирида 230 миң адәмгә қамақ җазаси вә башқа җазаларни берип, хитайниң мәмликәт миқяси вә уйғур аптоном райони тарихида йеңи рекорт яратқанлиқини билдүргән.

Хәвәрдә қәйт қилинишичә, «ню-йорк вақти гезити» хитайниң һазирға қәдәр елан қилинмиған рәсмий әдлийә санлиқ мәлуматлириға еришкән болуп, улар бу санлиқ мәлуматларни анализ қилиш арқилиқ бу мәзгил ичидә уйғур районида қолға елиш, сотлаш вә қамаққа һөкүм қилишниң шиддәтлик артқанлиқини байқиған.

Кишилик һоқуқни қоғдиғучилар хитай һөкүмитиниң 2017‏-йили 2‏-айда башланған кәң көләмлик тутқун қилиш һәрикитидә 2 милйондәк уйғур, қазақ вә башқа мусулманларниң тутқун қилинип, лагерларға қамалғанлиқи, йүз миңлиған кишиниң қануний рәсмийәтсиз қамақ җазалириға һөкүм қилинғанлиқини илгири сүрүп кәлгән иди.

«Ню-йорк вақти гезити» ниң қәйт қилишичә, уйғур районида 2017‏-йилиниң өзидә 87 миң кишигә қамақ җазаси берилгән болуп, 5 йил яки униңдин артуқ қамақ җазасиға һөкүм қилинғанлар алдинқи йилқидин 10 һәссә артқан. Шу йили «дөләт бихәтәрликигә тәһдит селиш «қа мунасивәтлик делолар 60 миң 510 кә, «иҗтимаий тәртипни қалаймиқан қилиш» қа мунасивәтлик делолар50 миңға йәткән.

Һалбуки, фирансийә агентлиқиниң хәвиридә қәйт қилинишичә, районда 2007‏-йили «дөләт бихәтәрлики» гә алақидар делолар 1710, «иҗтимаий тәртипни қалаймиқан қилиш» қа алақидар делолар 1764 икән.

Америка җорҗи вашингтон университети қанун институтиниң профессори доналд кларк «ню-йорк вақти гезити» гә қилған бу һәқтики сөзидә сотчиларниң бунчилик көп делони адил бир тәрәп қилишини тәсәввур қилиш мумкин әмәсликини билдүргән. У «әгәр улар коллектип сот ачмиған болса, сотчилар ақ қәғәзни сақчи вә тәптишләрниң қолиға тутқузуп, һөкүмнамини өзлириниң тошқузивелишиға тапшурған болиду,» дегән.

Пикирләр (0)
Share
Толуқ бәт