"Gérmaniye dolqunliri" radiyosi: "Xitaydiki Uyghurlar shinjang lagérliridiki saxta sotlarda sotlinip, mehkum bolmaqta"

Muxbirimiz erkin
2020-06-08
Élxet
Pikir
Share
Print

"Gérmaniye dolqunliri" radiyosi 8-iyun küni xitayning jaza lagérliridiki Uyghurlar heqqide chong hejimlik xewer bérip, nurghun Uyghur tutqunlarning lagérdiki saxta sotlarda sotlinip, mehkum bolghanliqini ilgiri sürdi.

Xewerde ashkarilishiche, da'iriler bu xil saxta sotta lagérdiki tutqunlargha bir jinayet tizimlikini bérip, ularni tizimliktiki bir yaki birqanche jinayetni tallashqa zorlaydiken. Ilgiri xitay hökümitining 2017-yili bashlan'ghan zor tutqunida milyonlighan Uyghurni lagérlargha qamap, nurghun tutqunlarni sotlighanliqi, sotlan'ghan tutqunlarning xitay ölkiliridiki türmilerge yötkep kétilgenliki ilgiri sürülgen idi.

Xewerde tekitlinishiche, tutqunlargha ularning néme üchün qamalghanliqi éytilmaydiken. Peqet ular tizimliktiki bir yaki bir qanche jinayetni tallap, özlirining néme üchün tutqun qilin'ghanliqi we késilgenlikini özi békitidiken. Jinayitini tallashni ret qilghanlargha "Menggü lagérda qalidighanliqi" heqqide tehdit sélinidiken. Xewerde bu sotning pütünley saxta ikenliki, uningda tutqunning adwokat teklip qilalmaydighanliqi, delil-ispat, qanun-tertip dégenlerge emel qilinmaydighanliqi tekitlen'gen. Xewerde bildürüshiche, ular lagérda yétip chiqqan 4 shahitni ayrim-ayrim ziyaret qilghan.

Hazir qazaqistanda yashawatqan bu 4 shahit tizimlikke 70 nechche xil jinayet kirgüzülgenliki, özlirining tizimliktiki bir yaki bir qanche jinayetni tallashqa mejbur bolghanliqini, uningdiki bezi "Jinayetler" ning chet'elge chiqish, kishiler bilen alaqilishish dégendek bigunah heriketler ikenlikini, köp qismi namaz oqush, hijaplinish dégendek diniy pa'aliyetlerge chétishliq ikenlikini bildürgen. "Gérmaniye dolqunliri" ning tekitlishiche, ular bu 4 shahitning sözlirini musteqil delilliyelmigen bolsimu, emma "Ularning sözliri halqiliq nuqtilarda bir-birini toluqlaydiken."

Toluq bet