«Германийә долқунлири» радийоси: «хитайдики уйғурлар шинҗаң лагерлиридики сахта сотларда сотлинип, мәһкум болмақта»

Мухбиримиз әркин
2020-06-08
Елхәт
Пикир
Share
Принт

«Германийә долқунлири» радийоси 8-июн күни хитайниң җаза лагерлиридики уйғурлар һәққидә чоң һәҗимлик хәвәр берип, нурғун уйғур тутқунларниң лагердики сахта сотларда сотлинип, мәһкум болғанлиқини илгири сүрди.

Хәвәрдә ашкарилишичә, даириләр бу хил сахта сотта лагердики тутқунларға бир җинайәт тизимликини берип, уларни тизимликтики бир яки бирқанчә җинайәтни таллашқа зорлайдикән. Илгири хитай һөкүмитиниң 2017-йили башланған зор тутқунида милйонлиған уйғурни лагерларға қамап, нурғун тутқунларни сотлиғанлиқи, сотланған тутқунларниң хитай өлкилиридики түрмиләргә йөткәп кетилгәнлики илгири сүрүлгән иди.

Хәвәрдә тәкитлинишичә, тутқунларға уларниң немә үчүн қамалғанлиқи ейтилмайдикән. Пәқәт улар тизимликтики бир яки бир қанчә җинайәтни таллап, өзлириниң немә үчүн тутқун қилинғанлиқи вә кесилгәнликини өзи бекитидикән. Җинайитини таллашни рәт қилғанларға «мәңгү лагерда қалидиғанлиқи» һәққидә тәһдит селинидикән. Хәвәрдә бу сотниң пүтүнләй сахта икәнлики, униңда тутқунниң адвокат тәклип қилалмайдиғанлиқи, дәлил-испат, қанун-тәртип дегәнләргә әмәл қилинмайдиғанлиқи тәкитләнгән. Хәвәрдә билдүрүшичә, улар лагерда йетип чиққан 4 шаһитни айрим-айрим зиярәт қилған.

Һазир қазақистанда яшаватқан бу 4 шаһит тизимликкә 70 нәччә хил җинайәт киргүзүлгәнлики, өзлириниң тизимликтики бир яки бир қанчә җинайәтни таллашқа мәҗбур болғанлиқини, униңдики бәзи «җинайәтләр» ниң чәтәлгә чиқиш, кишиләр билән алақилишиш дегәндәк бигунаһ һәрикәтләр икәнликини, көп қисми намаз оқуш, һиҗаплиниш дегәндәк диний паалийәтләргә четишлиқ икәнликини билдүргән. «Германийә долқунлири» ниң тәкитлишичә, улар бу 4 шаһитниң сөзлирини мустәқил дәлиллийәлмигән болсиму, әмма «уларниң сөзлири һалқилиқ нуқтиларда бир-бирини толуқлайдикән.»

Пикирләр (0)
Share
Толуқ бәт