Uyghur kishilik hoquq qurulushi xelq'arani Uyghur balilirining mesilisige köngül bölüshke chaqirdi

Muxbirimiz erkin
2019-11-20
Élxet
Pikir
Share
Print

Amérikadiki "Uyghur kishilik hoquq qurulushi" teshkilati dunya balilar küni munasiwiti bilen bayanat élan qilip, xelq'ara jem'iyetni xitayning Uyghur balilirini ata-anisidin ayriwétish siyasitige xatime bérish üchün derhal heriketke ötüshke ündigen. Bayanatta, xitayning Uyghur a'ililirini ayriwétishke xatime bérishi, uning élip bériwatqan "Medeniyet qirghinchiliqi" ni toxtitishi kérekliki tekitlen'gen.

20‏-Noyabir b d t ning "Balilar hoquqi ehdinamisi" maqullan'ghanliqining 30 yilliq xatire küni bolup, bu kün birdek dunya balilar küni, dep qobul qilin'ghan. Xitay hökümiti balilar hoquqi ehdinamisini 1992‏-yilliq testiqlighanidi.

"Uyghur kishilik hoquq qurulushi" 19‏-noyabir küni élan qilghan bayanatida, xitay hökümitining Uyghur rayonida insaniyetke qarshi jinayet sadir qiliwatqanliqi, uning balilar hoquqi ehdinamisining 9‏-maddisigha xilapliq qiliwatqanliqi tekitlinip, b d t xewpsizlik kéngishi we her qaysi hökümetlerni xitay hökümitige émbargo yürgüzüshke ündigen.

Xitay hökümitining 2017‏-yili 2‏-ayda bashlan'ghan keng kölemlik tutqunida milyonlighan musulman lagérlargha qamilip, a'ililer weyran bolghan, nurghun balilar qaranchuqsiz qalghan. Qaranchuqsiz qalghan nurghun balilar yétimxanilargha orunlashturulghan. Bu jeryanda balilarning ach qélip yaki tonglap ölüp kétishidek paji'elik weqeler yüz bergen. Chet'eldiki bezi ata-anilar özlirining alaqisi üzülüp qalghan yurtidiki perzentlirini xitay hökümitining teshwiqat widiyoliridin tonup qalidighan ehwallar yüz bergen. Bu ehwal xelq'ara taratqular we kishilik hoquq teshkilatlirining qattiq diqqitini qozghap kelgenidi. "Nyu-york waqti" géziti 16‏-noyabir küni élan qilghan xitayning lagérlar heqqidiki 403 betlik mexpiy höjjitide, Uyghur balilirining ehwaligha da'ir bezi tepsilatlar ashkarilan'ghan. Höjjette, Uyghur balilirining lagérdiki ata-anilirigha da'ir so'allirigha néme, dep jawab bérish heqqide tepsiliy körsetmiler bérilgenidi.

Toluq bet