Уйғур кишилик һоқуқ қурулуши хәлқарани уйғур балилириниң мәсилисигә көңүл бөлүшкә чақирди

Мухбиримиз әркин
2019-11-20
Елхәт
Пикир
Share
Принт

Америкадики «уйғур кишилик һоқуқ қурулуши» тәшкилати дуня балилар күни мунасивити билән баянат елан қилип, хәлқара җәмийәтни хитайниң уйғур балилирини ата-анисидин айриветиш сияситигә хатимә бериш үчүн дәрһал һәрикәткә өтүшкә үндигән. Баянатта, хитайниң уйғур аилилирини айриветишкә хатимә бериши, униң елип бериватқан «мәдәнийәт қирғинчилиқи» ни тохтитиши керәклики тәкитләнгән.

20‏-Ноябир б д т ниң «балилар һоқуқи әһдинамиси» мақулланғанлиқиниң 30 йиллиқ хатирә күни болуп, бу күн бирдәк дуня балилар күни, дәп қобул қилинған. Хитай һөкүмити балилар һоқуқи әһдинамисини 1992‏-йиллиқ тәстиқлиғаниди.

«Уйғур кишилик һоқуқ қурулуши» 19‏-ноябир күни елан қилған баянатида, хитай һөкүмитиниң уйғур районида инсанийәткә қарши җинайәт садир қиливатқанлиқи, униң балилар һоқуқи әһдинамисиниң 9‏-маддисиға хилаплиқ қиливатқанлиқи тәкитлинип, б д т хәвпсизлик кеңиши вә һәр қайси һөкүмәтләрни хитай һөкүмитигә ембарго йүргүзүшкә үндигән.

Хитай һөкүмитиниң 2017‏-йили 2‏-айда башланған кәң көләмлик тутқунида милйонлиған мусулман лагерларға қамилип, аилиләр вәйран болған, нурғун балилар қаранчуқсиз қалған. Қаранчуқсиз қалған нурғун балилар йетимханиларға орунлаштурулған. Бу җәрянда балиларниң ач қелип яки тоңлап өлүп кетишидәк паҗиәлик вәқәләр йүз бәргән. Чәтәлдики бәзи ата-анилар өзлириниң алақиси үзүлүп қалған юртидики пәрзәнтлирини хитай һөкүмитиниң тәшвиқат видийолиридин тонуп қалидиған әһваллар йүз бәргән. Бу әһвал хәлқара таратқулар вә кишилик һоқуқ тәшкилатлириниң қаттиқ диққитини қозғап кәлгәниди. «Ню-йорк вақти» гезити 16‏-ноябир күни елан қилған хитайниң лагерлар һәққидики 403 бәтлик мәхпий һөҗҗитидә, уйғур балилириниң әһвалиға даир бәзи тәпсилатлар ашкариланған. Һөҗҗәттә, уйғур балилириниң лагердики ата-анилириға даир соаллириға немә, дәп җаваб бериш һәққидә тәпсилий көрсәтмиләр берилгәниди.

Пикирләр (0)
Share
Толуқ бәт