Уйғур елидики дөләт кадирлири «қара күчләни тазилаш» һәрикитиниң асаслиқ нишаниға айланған

Мухбиримиз ирадә
2019-04-25
Елхәт
Пикир
Share
Принт

Хитай һөкүмити уйғур елидә аталмиш «қара күчләрни тазилаш» дегән нам билән елип бериватқан һәрикити арқилиқ йәрлик хәлқ аммисини йәнә мәсилә паш қилишқа яки өзини өзини мәлум қилишқа қистимақта.

25-Апрел күни ақсу вилайәтлик интизам тәкшүрүш комитети, ақсу вилайәтлик ревизийә комитети бир уқтуруш елан қилип, аталмиш қара күчләрниң, рәзилликкә, чирикликкә четишлиқ мәсилиси барлар вә һоқуқидин пайдилинип туруп башқиларға чапан япқан партийә әзалири, кадирлар вә дөләт хизмәтчилирини бәлгиләнгән мөһләт ичидә мәсилисини тәшәббускарлиқ билән тапшуруш һәққидә уқтуруш тарқатқан.

Уйғур районидики һәрқайси җайларда йеқиндин буян бу аталмиш «қара күчләрни» сүпүрүп ташлаш һәрикити омумйүзлүк қозғалған иди. Әмма ақсу вилайити тәрипидин тарқитилған бу уқтурушниң мәхсус һалда кадирлар вә дөләт хизмәтчилиригә қаритилғанлиқи диққәт қозғиди.

Бу һәқтики уқтурушта «уқтуруш елан қилинған күндин башлап бир ай ичидә өзиниң интизамға, қанунға хилап мәсилисини тәшәббускарлиқ билән тапшурғанлар қанун бойичә йеник яки йениклитип бир тәрәп қилиниду. Қилмиши бир қәдәр йеник болғанлар бир тәрәп қилиштин кәчүрүм қилиниду» дегәндәк ибариләр қоллинилған.

Дәрвәқә, бүгүн «шинҗаң гезити» дә йеңисар наһийәси, ғулҗа наһийәси вә аратүрк наһийәси қатарлиқ 6 наһийәдин 6 нәпәр дөләт кадири үстидин «мәркәзниң 8 түрлүк бәлгилимисигә хилаплиқ қилиш» дегән җинайәт билән уқтуруш чиқирилған.

Хитай һөкүмити 2017-йили миңлиған кишиләрни лагерға солашни башлаштин бурун кәң хәлқ аммиси арисида мушундақ «тәшәббускарлиқ билән мәсилә паш қилиш һәрикити» қозғиған иди.

Пикирләр (0)
Share
Толуқ бәт