Хитай даирилири пүткүл уйғурларниң саламәтлик әһвалини архиплаштуруп болған

Мухбиримиз әзиз
2019-07-03
Елхәт
Пикир
Share
Принт

Уйғур диярида өткән бирнәччә йилда тохтавсиз давам қилған «һәқсиз саламәтлик тәкшүрүш» паалийити һәққидә түрлүк мәлумат вә хәвәрләр оттуриға чиқип кәлгән иди. 2-Июл күни хитай даирилири үрүмчи шәһиридә ахбарат елан қилиш йиғини ечип, омумйүзлүк саламәтликни тәкшүрүш хизмитиниң нөвәттики тәрәққиятидин доклат бәргән.

«Тәңритағ» ториниң 3-июлдики хәвиридин мәлум болушичә, 2016-йили башланған омумйүзлүк саламәтлик тәкшүрүш паалийити үч йил давам қилған. Бу җәрянда 53 милйон адәм қетимдин көпрәк саламәтлик тәкшүрүши тамамланған болуп, буниңға алди-кәйни болуп 40 милярд сом (тәхминән алтә милярд америка доллири) дин көпрәк чиқим сәрп болған.

Уда үч йил давам қилған омумйүзлүк саламәтлик тәкшүрүш хизмити җәрянида алақидар сәһийә тармақлири «чоң санлиқ мәлумат» техникисини көпләп қолланған. Бу җәрянда саламәтлик тәкшүрүшигә қатнашқан кишиләрниң саламәтлик әһвали, кесәллик әһвали вә башқа физиологийәлик әһвали тәпсилий тәкшүрүлүп «чоң сандан» ға киргүзүлгән.

Ахбарат елан қилиш йиғинида алақидар хитай әмәлдарлар сөз қилип, омумйүзлүк саламәтлик тәкшүрүш хизмитиниң муһим әһмийитиниң бири «шинҗаңдики иҗтимаий муқимлиқ вә узун мәзгиллик тинчлиқтәк баш нишанниң әмилишишини зор дәриҗидә илгири сүрүш» икәнликини билдүргән.

Гәрчә хитай даирилири омумйүзлүк саламәтлик тәкшүрүш хизмитини һөкүмәтниң «хәлқ турмушини яхшилаш» җәһәттики хизмәтлириниң бири қатарида тәшвиқ қиливатқан болсиму, алақидар хәвәрләр буниң йәрлик хәлқ болған уйғурларниң саламәтлик әһвалиға һечқандақ мәнпәәт елип кәлмәйдиғанлиқини ишарә қилмақта. Муһаҗирәттики анализчилар бу һәқтә пикир қилип «хитай һөкүмити бунчә зор миқдарда мәбләғ аҗритип бикардин-бикарға уйғурларниң саламәтликини тәкшүрүп йүргини йоқ. Уларниң мәқсити уйғурларниң биологийәлик вә физиологийәлик учурлирини кәлгүсидики қәбиһ мәқсәтлири үчүн алдин топлаш,» деди.

Пикирләр (0)
Share
Толуқ бәт