Үрүмчидә алтә чәтәлликкә «тәңритағ мукапати» берилди

Мухбиримиз әзиз
2018-10-30
Елхәт
Пикир
Share
Принт

«Хитай хәвәрлири» ториниң 30-өктәбирдики хәвиридә ейтилишичә, чәтәллик алтә нәпәр мутәхәссискә «тәңритағ мукапати» ни бериш мурасими 29-өктәбирдә үрүмчи шәһиридә өткүзүлгән.

Хәвәрдин мәлум болушичә, бу алтә мутәхәссис өзбекистан, фирансийә қатарлиқ әлләрдин кәлгән болуп, уйғур аптоном районлуқ һөкүмәт уларға «тәңритағ мукапати» тарқитип бәргән. Бу кишиләрниң «шинҗаңдики иҗтимаий муқимлиқ вә узун мәзгиллик әминликни бәрпа қилишқа төһпә қошқан» лиқи болса алаһидә гәвдиләндүрүлгән.

Өткән йерим йил ичидила уйғурлар дияридики зор көпчилик кишиләргә тонушлуқ болған нәччә онлиған уйғур зиялийлири арқиму-арқидин тутқун қилинған иди. Шулар қатарида «тәңритағ алими» намиға еришкән доктор зулпиқар барат өзбашму лагерға елип кетилгән иди. Д у қ ниң баянатчиси дилшат решит бу һәқтә сөз қилип «бу хитай һөкүмитиниң бир қисим чәтәллик мутәхәссисләрни мукапатлаш арқилиқ дуняға ‹биз илим әһлини қәдирләватимиз' дәп сахта учур йоллаш оюни. Улар шу арқилиқ өзлириниң уйғур зиялийлирини бастурушни ақлимақчи» деди. 

Бу мукапатларниң тарқитилиши уйғурларниң халмурат ғопур, ташполат тейип, абдуқадир җалалидин вә башқа нәччә онлиған атақлиқ профессорлири вә алимлири қамақ җазалириға һәм лагерларға мәһкум қилинип, хитай даирилириниң бу қилмишлири хәлқара җәмийәт вә уйғурларниң әйиблишигә учраватқан вәзийәткә тоғра кәлди.

Алақидар мәлуматларда көрситилишичә, «тәңритағ мукапати» 1999-йили тәсис қилинған болуп, йилда бир қетим тарқитилидикән. У мәхсус уйғурлар дияридики «иҗтимаий тәрәққият вә иқтисадий қурулушқа көрүнәрлик төһпә қошқан» чәтәл мутәхәссислиригә берилидикән. Һазирғичә 98 киши мушу мукапатни алған икән.

Пикирләр (0)
Share
Толуқ бәт