Үрүмчидә яйлиқи тартивелинған қазақ чарвичилар моһтаҗлиқта қалғанлиқини билдүрди

Мухбиримиз меһрибан
2015-12-31
Елхәт
Пикир
Share
Принт

Үрүмчи булақтағ йәни шүмогув районидики қазақ чарвичиларниң радиомиз хитай бөлүмигә билдүрүшичә, 2007 йили булақтағ яйлиқидики 100 дин артуқ чарвичиниң 1980 мо әтрапидики яйлиқи даириләр тәрипидин «икки йил яйлақни дәм алдуруш, отлақни әслигә кәлтүрүш» намида тартивелинғандин кейин, иқтисадий мәнбәсидин айрилған қазақ чарвичилар турмушта моһтаҗлиқта қалған.

Радиомиз зияритини қобул қилған қазақ чарвичиларниң билдүрүшичә, булақтағ районидики чарвичилар 80-йилларниң бешида адәм бешиға 45 мо яйлақни 50 йиллиқ көтүригә алған. 2007-Йилиға кәлгәндә даириләр йезилиқ һөкүмәт арқилиқ бу йәрдики 100 дин артуқ чарвичиға уқтуруш қилип, «2007-йилдин 2009-йилғичә икки йил ичидә яйлақниң екологийилик муһитини яхшилаш пиланиға асасән яйлақта чарва беқиш вақтинчә тохтайдиғанлиқи, әмма икки йилдин кейин яйлақниң йәнә чарвичиларниң пайдилинишиға қайтуруп берилидиған» лиқини билдүргән.

Әмма чарвичилар икки йилдин кейин яйлақни қайтуруп беришни тәләп қилғанда, даириләр һәр хил баһаниләрни көрситип яйлақни қайтуруп беришни рәт қилған.  Йеқинқи йилларда яйлақ орниға дачилар селинишқа башлиғандин кейин, қазақ чарвичилардин 10 нәччә киши яйлақни қайтуруп беришни тәләп қилип әрз қилғанда йәрлик һөкүмәт даирилири әвәткән сақчилар тәрипидин тутқун қилинған вә әрз қилмаслиққа агаһландурулған вә тәһдиткә учриған.

Радиомиз зияритини қобул қилған қазақ чарвичиларниң билдүрүшичә, нөвәттә үрүмчи әтрапидики җәнубий тағ,(нәнсән). Шималий тағ (бейсән), шәрқий тағ (доңсән) районидики қазақ чарвичиларниң яйлақлири «тағниң екологийилик муһитини асраш» дегәндәк намлар билән, тартивелинғанлиқи үчүн, чарва беқиштин мәһрум қилинған чарвичилар турмушини қамдашқа амалсиз қалидиған вәзийәт шәкилләнгән.

Пикирләр (0)
Share
Толуқ бәт