Түркийәдики уйғур мусапири хитайға қайтурулуштин әндишә қилмақта

Мухбиримиз әркин
2019-08-12
Елхәт
Пикир
Share
Принт

Түркийә ички ишлар министири һечқандақ уйғурниң хитайға қайтурулмайдиғанлиқини билдүргән болсиму, лекин уйғурларниң йәнила хитайға қайтурулуш хәвпигә дуч келиватқанлиқи илгири сүрүлмәктә.

Фирансийә агентлиқиниң хәвәр қилишичә, нөвәттә түркийәниң қирқларәли вилайитидики пәһливанкөй қайтуруш мәркизидә тутуп турулуватқан уйғур мусапири әхмәт шәмшидин әнә шундақ хәвпкә дуч келиватқан уйғурларниң бири икән. У йеқинда фирансийә агентлиқи мухбириниң телефон зияритини қобул қилғанда юртидики уруқ-туғқанлириниң өзини қайтуруп келиш һәққидики бир һөҗҗәткә имза қойдурулғанлиқини, түркийәниң бу һөҗҗәтләрни дәсмайә қилип, өзини хитайға қайтуруп беришидин қаттиқ әндишә қиливатқанлиқини билдүргән.

Фирансийә агентлиқиниң хәвиридә қәйт қилинишичә, бу йил 29 яшлиқ әхмәт шәмшидинниң түркийәдә турушлуқ гуваһнамиси вә ишләш рухсити болсиму, лекин у бу йил 30‏-майда тутқун қилинип, пәһливанкөйдики қайтуруш мәркизигә солап қоюлған икән. Нөвәттә түркийәдики қайтуруш мәркәзлиридә қанчилик уйғурниң тутуп турулуватқанлиқи мәлум әмәс. Йеқинда түркийә көчмәнләр идарисиниң зиннәтгүл турсун исимлик бир уйғур аялни 2 балиси билән хитайға қайтуруветиши муһаҗирәттики уйғурларда қаттиқ ғулғула қозғиған иди.

Мәлум болушичә, истанбулдики аптомобил запчаслирини ишләпчиқириш сехини маңдуруватқан әхмәт шәмшидин түркийә даирилири тәрипидин «уйғур миллий һәрикити» намлиқ бир террорлуқ тәшкилатиниң «асаслиқ пул билән тәминлигүчилириниң бири» дәп әйибләнгән икән. Һалбуки, әхмәт шәмшидин фирансийә агентлиқиға өзиниң «бундақ бир тәшкилатни һеч аңлап бақмиғанлиқи» ни билдүргән. Униң қәйт қилишичә, у өзиниң зиннәтгүл турсунға охшаш ақивәткә қелиштин әндишә қилмақта икән. Түркийә көчмәнләр идариси зиннәтгүл турсунни «таҗикистан пуқраси» дәп таҗикистанға йолға селивәткән болуп, у йәрдин хитайға өткүзүп берилгән иди.

Пикирләр (0)
Share
Толуқ бәт